کینیا کی 22 سالہ ماحولیاتی کارکن Truphena Muthoni نے درختوں کی اہمیت اور ماحولیات کے تحفظ کے پیغام کو اجاگر کرنے کے لیے ایک عالمی ریکارڈ قائم کیا ہے۔ Truphena نے ایک درخت کے گرد اپنے بازو 72 گھنٹے تک پھیلائے رکھے اور اسے گلے لگائے رکھا، جس کے نتیجے میں ان کا نام گنیز ورلڈ ریکارڈ میں شامل ہو گیا۔
اس سے قبل یہ ریکارڈ گھانا کے Frederick Boke کے نام تھا، جنہوں نے 50 گھنٹے، 2 منٹ اور 28 سیکنڈ تک ایک درخت کو گلے لگانے میں کامیابی حاصل کی تھی۔ Truphena نے اپنی اس شاندار کاوش سے پہلے فروری 2025 میں ایک درخت کو 48 گھنٹے تک گلے لگایا تھا، جسے انہوں نے ایک تجرباتی مرحلہ قرار دیا تھا۔
Truphena نے گنیز ورلڈ ریکارڈ کو بتایا کہ پہلی کوشش بنیادی طور پر ایک آزمائش تھی تاکہ وہ اپنی حدیں جان سکیں اور یہ سمجھ سکیں کہ لمبے عرصے تک درخت کو گلے لگانا کس طرح ممکن ہے۔ ان کے مطابق دوسری کوشش میں عزم اور مستقل مزاجی شامل تھی اور انہیں احساس ہوا کہ دنیا کو اس قسم کے ماحول دوست اقدامات کی زیادہ ضرورت ہے۔
نوبیل انعام کی کال کو اسپیم سمجھ کر کاٹ دیا: امریکی سائنس دان کی دلچسپ غلط فہمی
انہوں نے کہا کہ یہ ریکارڈ صرف ذاتی کامیابی نہیں بلکہ ایک پیغام ہے کہ سیارے اور ماحول کا خیال رکھنا ہر فرد کی ذمہ داری ہے۔ Truphena کے مطابق اس طرح کے اقدامات سے لوگوں میں ماحولیات کے تحفظ اور درختوں کے تحفظ کی اہمیت کے بارے میں شعور پیدا ہوتا ہے۔
ماحولیاتی ماہرین نے Truphena کی کوشش کو نہ صرف غیر معمولی بلکہ قابل تقلید قرار دیا ہے، کیونکہ اس طرح کے اقدامات نوجوان نسل کو درختوں اور ماحول کے تحفظ کی جانب متوجہ کرتے ہیں۔ یہ ریکارڈ عالمی سطح پر ماحول دوست سرگرمیوں کے فروغ میں اہم سنگ میل ثابت ہو سکتا ہے۔
اس کامیابی کے بعد Truphena Muthoni کو عالمی سطح پر پہچان حاصل ہوئی اور انہوں نے وعدہ کیا ہے کہ وہ اسی طرح ماحولیات کے تحفظ کے لیے آگے بڑھتی رہیں گی اور دنیا کو یہ دکھائیں گی کہ چھوٹے چھوٹے اقدامات بھی بڑے اثرات مرتب کر سکتے ہیں۔
