زاہدان ، ایران کے جنوب مشرقی صوبے سیستان و بلوچستان کے شہر زاہدان میں واقع جوڈیشل کمپلیکس پر مسلح دہشتگردوں نے حملہ کر دیا، جس کے نتیجے میں 5 افراد جان کی بازی ہار گئے جبکہ 13 زخمی ہوئے ہیں،دہشتگرد عدالتی عمارت کے اندر داخل ہوئے اور ججز کے چیمبرز سمیت مختلف دفاتر میں اندھا دھند فائرنگ کرتے رہے، جس سے خوف و ہراس کی فضا پیدا ہو گئی۔
سکیورٹی فورسز نے فوری طور پر جوابی کارروائی کرتے ہوئے تین دہشتگردوں کو موقع پر ہی ہلاک کر دیا اور عمارت کو کلیئر کرایا۔ واقعے کے بعد پورے علاقے میں سیکیورٹی ہائی الرٹ کر دی گئی ہے جبکہ زخمیوں کو قریبی اسپتال منتقل کیا گیا ہے، جن میں بعض کی حالت تشویشناک بتائی جا رہی ہے۔
غیر ملکی خبر رساں اداروں اور ایرانی میڈیا کے مطابق کالعدم مسلح گروہ "جیش العدل” نے اس حملے کی ذمہ داری قبول کر لی ہے۔ جیش العدل ایران کے بلوچ اکثریتی علاقوں میں سنی اکثریتی عسکری گروہ کے طور پر جانا جاتا ہے، جو ماضی میں بھی سیکیورٹی اہلکاروں اور ریاستی اداروں پر حملوں میں ملوث رہا ہے۔
ایران کی وزارتِ داخلہ اور جوڈیشل کونسل نے حملے کی شدید مذمت کی ہے اور اس واقعے کو ریاستی اداروں پر بزدلانہ حملہ قرار دیا ہے۔ ایرانی حکام نے کہا ہے کہ ذمہ دار عناصر کو کیفر کردار تک پہنچایا جائے گا اور دہشتگردی کے خلاف کارروائی مزید سخت کی جائے گی۔
