10
کولمبو،سری لنکا کے سابق صدر رانیل وکرماسنگھے کو منگل کے روز ضمانت مل گئی۔ 76 سالہ رہنما کو گزشتہ ہفتے کولمبو میں ان کے دور صدارت کے دوران ریاستی فنڈز کے مبینہ غلط استعمال کے الزامات کے تحت گرفتار کیا گیا تھا۔
یونائیٹڈ نیشنل پارٹی کے مطابق وکرماسنگھے کی صحت خراب ہونے کی وجہ سے انہیں سرکاری اسپتال میں داخل کیا گیا تھا۔ آج انہوں نے اسپتال سے زوم کے ذریعے عدالت میں اپنے کیس کی سماعت میں شرکت کی۔
سری لنکن میڈیا کے مطابق وکرماسنگھے تحقیقات کے سلسلے میں بیان ریکارڈ کروانے کے لیے سی آئی ڈی کے دفتر گئے تھے جہاں انہیں گرفتار کر لیا گیا۔
پولیس کا کہنا ہے کہ 2023 میں وکرماسنگھے نے اپنی اہلیہ کے ساتھ ایک برطانوی یونیورسٹی کی تقریب میں شرکت کے لیے لندن کا دورہ کیا تھا، جس کے اخراجات مبینہ طور پر ریاستی خزانے سے ادا کیے گئے۔ کیس اب بھی زیرِ تحقیق ہے اور حکام اس مبینہ مالی بدعنوانی سے متعلق شواہد اکٹھا کر رہے ہیں۔
سابق صدر کو ضمانت ملنے کے بعد ملک میں مالی شفافیت اور ریاستی وسائل کے مؤثر استعمال کے حوالے سے سوالات اور توجہ بڑھ گئی ہے۔
