بھارت کے معروف گلوکار اور موسیقار زوبین گرگ اسکوبا ڈائیونگ کے دوران انتقال کر گئے۔
بھارتی میڈیا کے مطابق وہ سنگاپور میں نارتھ ایسٹ فیسٹیول میں پرفارم کرنے والے تھے کہ اچانک اسکوبا ڈائیونگ کے دوران انہیں سانس لینے میں دشواری پیش آئی۔
زوبین گرگ کو فوراً پانی سے نکال کر اسپتال منتقل کیا گیا، جہاں ڈاکٹروں نے انہیں آئی سی یو میں رکھا اور فوری طور پر سی پی آر بھی دیا، تاہم وہ جانبر نہ ہو سکے۔ ان کی عمر 52 سال تھی۔
نارتھ ایسٹ فیسٹیول کے منتظمین نے ایک بیان میں کہا کہ "بہت دکھ کے ساتھ ہم زوبین کے انتقال کی خبر شیئر کر رہے ہیں۔ اسکوبا ڈائیونگ کے دوران انہیں سانس لینے میں شدید دشواری کا سامنا ہوا اور تمام کوششوں کے باوجود وہ بچ نہ سکے۔”
زوبین گرگ کی اچانک موت نے ان کے مداحوں، ساتھی فنکاروں اور پوری شوبز انڈسٹری کو گہرے صدمے میں ڈال دیا ہے۔ سوشل میڈیا پر مداح اور فنکار ان کی یادیں تازہ کر رہے ہیں اور خراجِ عقیدت پیش کر رہے ہیں۔
زوبین نے 2006 کی فلم گینگسٹر کے مشہور گانے ‘یا علی’ سے شہرت حاصل کی۔ اس کے علاوہ انہوں نے فلم کرش 3 کا "دل تو ہی بتا”، فلم پیار کے سائیڈ ایفیکٹس کا "جانے کیا چاہے من” جیسے مشہور گانے بھی دیے۔ وہ ہندی کے ساتھ ساتھ آسام، بنگالی، نیپالی اور دیگر زبانوں میں بھی گانے گاتے رہے۔
