پاکستان کے معروف صحافی اور تجزیہ کار رضوان رضی نے سابق ڈپٹی اسپیکر قومی اسمبلی قاسم سوری کی سرگرمیوں پر امریکی صدر ڈونلڈ ٹرمپ کی توجہ دلاتے ہوئے ایک سوشل میڈیا پوسٹ میں کہا کہ ’’مسٹر ٹرمپ، یہ شخص آپ کی فوجی پریڈ میں خلل ڈالنے کی منصوبہ بندی کر رہا ہے، اس کی نقل و حرکت پر نظر رکھیں۔‘‘
واقعہ کی تفصیلات کے مطابق پاکستان تحریکِ انصاف کی جانب سے عمران خان کی رہائی اور موجودہ حکومت کے خلاف امریکا میں احتجاجی ریلی کی تیاریاں جاری ہیں۔ بیرون ملک مقیم پی ٹی آئی رہنما سوشل میڈیا پر کارکنان کو احتجاج میں شرکت کی دعوت دے رہے ہیں، جبکہ وینز کے ذریعے عوامی مقامات پر مہم بھی چلائی جا رہی ہے۔
اسی حوالے سے ایک سوشل میڈیا صارف نے قاسم سوری سے سوال کیا کہ "ایمبیسی کے سامنے احتجاج کا کیا فائدہ ہوگا؟” جس پر قاسم سوری نے جواب دیتے ہوئے کہا کہ امریکی صدر ڈونلڈ ٹرمپ کی فوجی پریڈ اسی دن وائٹ ہاؤس کے قریب کانسٹی ٹیوشن ایونیو پر ہو رہی ہے، اور پورے علاقے کو بند کر دیا جائے گا۔
قاسم سوری کے اس بیان پر رضوان رضی نے فوری ردعمل دیتے ہوئے ان کی پوسٹ کو ٹرمپ کو ٹیگ کر کے توجہ دلوائی، جس سے یہ معاملہ سوشل میڈیا پر مزید زیر بحث آ گیا۔
دوسری جانب، پی ٹی آئی کے چیئرمین بیرسٹر گوہر ان احتجاجی سرگرمیوں سے واضح لاتعلقی کا اعلان کر چکے ہیں۔ ان کا مؤقف ہے کہ پارٹی کا ان ریلیوں یا مظاہروں سے کوئی تعلق نہیں۔
ادھر، امریکا میں پی ٹی آئی کی سرگرمیوں اور ٹرمپ پریڈ کی سیکیورٹی کے حوالے سے سوشل میڈیا پر بحث جاری ہے، اور امکان ظاہر کیا جا رہا ہے کہ امریکی حکام ان حرکات پر نظر رکھے ہوئے ہیں۔
