امریکی ریاست فلوریڈا کے شہر لاؤڈر ہل میں کھیلے گئے تیسرے اور فیصلہ کن ٹی ٹوئنٹی میچ میں پاکستان نے ویسٹ انڈیز کو 13 رنز سے شکست دے کر تین میچز پر مشتمل سیریز 1-2 سے جیت لی۔
پاکستان نے ٹاس جیت کر پہلے بیٹنگ کا فیصلہ کیا اور مقررہ 20 اوورز میں 4 وکٹوں کے نقصان پر 189 رنز بنائے۔ بیٹنگ میں اوپنرز صائم ایوب اور صاحبزادہ فرحان نے شاندار کھیل کا مظاہرہ کیا۔ فرحان نے 74 جبکہ صائم نے 66 رنز کی اننگز کھیلی۔ حسن نواز 15، محمد حارث 2 رنز بنا کر آؤٹ ہوئے۔ اختتامی لمحات میں خوشدل شاہ نے 11 اور فہیم اشرف نے 10 رنز بنا کر ٹیم کا مجموعہ مضبوط کیا اور ناٹ آؤٹ رہے۔
جواب میں ویسٹ انڈیز کی ٹیم 190 رنز کے ہدف کے تعاقب میں مقررہ اوورز میں 6 وکٹوں پر 176 رنز ہی بنا سکی۔ یوں پاکستان نے میچ 13 رنز سے اپنے نام کیا۔
بالنگ کے شعبے میں پاکستان کی جانب سے حسن علی، حارث رؤف، صائم ایوب، سفیان مقیم اور محمد نواز نے ایک ایک کھلاڑی کو پویلین کی راہ دکھائی۔
ویسٹ انڈیز کی جانب سے جیسن ہولڈر، روسٹن چیز اور شمار جوزف نے ایک ایک وکٹ حاصل کی۔
اس میچ میں پاکستان ٹیم میں دو تبدیلیاں کی گئیں، فخر زمان کی جگہ خوشدل شاہ جبکہ شاہین شاہ آفریدی کی جگہ حارث رؤف کو شامل کیا گیا۔
سیریز کا یہ آخری اور فیصلہ کن میچ تھا جس میں کامیابی حاصل کرکے پاکستان نے سیریز 2-1 سے جیت لی۔
