پاک فوج کی کور کمانڈرز کانفرنس میں اس عزم کا اعادہ کیا گیا ہے کہ قومی یکجہتی، سلامتی اور ملک کے استحکام کو نقصان پہنچانے کی کسی بھی کوشش کو ہرگز برداشت نہیں کیا جائے گا، چاہے اس میں ملوث عناصر کا تعلق کسی بھی طبقے یا سیاسی گروہ سے ہو۔ فورم نے واضح پیغام دیا کہ ریاست کے خلاف سرگرم تمام عناصر سے بلاامتیاز نمٹا جائے گا۔
پاک فوج کے شعبہ تعلقات عامہ (آئی ایس پی آر) کے مطابق فیلڈ مارشل سید عاصم منیر کی زیر صدارت 273ویں کور کمانڈرز کانفرنس منعقد ہوئی۔ اجلاس کے آغاز میں حالیہ دہشت گردی کے واقعات میں شہید ہونے والے سیکیورٹی اہلکاروں اور شہریوں کے ایصالِ ثواب کے لیے فاتحہ خوانی کی گئی، جبکہ شہداء کو ان کی عظیم قربانیوں پر خراجِ عقیدت پیش کیا گیا۔
کانفرنس کے شرکاء نے اس بات پر زور دیا کہ غیر ملکی ایما پر پاکستان میں دہشت گردی کو فروغ دینے کی کوششیں ناقابلِ قبول ہیں۔ فورم نے مادرِ وطن کا دفاع کرنے والے سیکیورٹی اہلکاروں کی جرات، پیشہ ورانہ مہارت اور قربانیوں کو سراہتے ہوئے ان کے عزم کو قابلِ تحسین قرار دیا۔ آئی ایس پی آر کے مطابق چیف آف ڈیفنس فورسز فیلڈ مارشل سید عاصم منیر نے افواجِ پاکستان کی غیر متزلزل کارکردگی کو زبردست خراجِ تحسین پیش کیا۔
کانفرنس میں اس بات کا اعادہ کیا گیا کہ بھارتی سرپرستی میں کام کرنے والے تمام دہشت گردوں، ان کے سہولت کاروں اور معاونین کے خلاف فیصلہ کن اور بغیر کسی رعایت کے کارروائی جاری رکھی جائے گی۔ آرمی چیف نے ملک بھر میں جاری انٹیلی جنس پر مبنی انسدادِ دہشت گردی کارروائیوں میں افواجِ پاکستان کی کوششوں کو سراہا اور آپریشنل تیاریوں پر اطمینان کا اظہار کیا۔
فیلڈ مارشل کی ملکی ترقی اور خارجہ پالیسی میں کوششوں پر کوئی ابہام نہیں: وزیر دفاع
فورم نے دہشت گردی، جرائم اور سیاسی مفادات کے گٹھ جوڑ کو یکسر مسترد کرتے ہوئے کہا کہ مسلح افواج اور پاکستانی عوام کے درمیان تفرقہ ڈالنے کی کسی کو اجازت نہیں دی جائے گی۔ کانفرنس میں اس امر پر بھی زور دیا گیا کہ حکومت اور پاک فوج کی مشترکہ کاوشوں سے ملک بتدریج استحکام کی جانب بڑھ رہا ہے، اور عوام کی ثابت قدم حمایت سے پاکستان عزت و وقار کے ساتھ ترقی کی راہ پر گامزن ہے۔
شرکاء نے بلوچستان حکومت کے خصوصی ترقیاتی اقدامات کو سراہتے ہوئے کہا کہ ایسے منصوبے سماجی روابط اور بہتر گورننس کے ذریعے دہشت گردی کے اسباب کے خاتمے میں مددگار ثابت ہو رہے ہیں۔ فورم نے ملک کے دیگر علاقوں میں بھی اسی طرز کے اقدامات کی ضرورت پر زور دیا۔
کانفرنس میں کشمیری عوام کے حقِ خودارادیت کی بھرپور حمایت کا اعادہ کیا گیا اور مسئلہ فلسطین پر پاکستان کے اصولی مؤقف کی توثیق کی گئی۔ فورم نے غزہ میں فوری اور مستقل جنگ بندی، بلا رکاوٹ انسانی امداد کی فراہمی اور فلسطینی ریاست کے قیام کے لیے قابلِ عمل راستے کا مطالبہ کیا۔
اجلاس کے اختتام پر آرمی چیف نے کمانڈرز کو ہدایت کی کہ وہ آپریشنل تیاری، نظم و ضبط، تربیت، جدید جنگی تقاضوں اور پیشہ ورانہ مہارت کے اعلیٰ ترین معیار کو ہر صورت برقرار رکھیں۔
