پاکستان پیپلز پارٹی کے سینئر رہنما اور سابق وفاقی وزیر نبیل گبول نے دعویٰ کیا ہے کہ عالمی اسٹریمنگ پلیٹ فارم نیٹ فلکس کراچی کے تاریخی اور قدیم علاقے لیاری پر مبنی ایک بڑی سیریز بنانے میں دلچسپی رکھتا ہے۔
ان کے مطابق اس منصوبے کا مقصد لیاری کی اصل تاریخ، ثقافت اور سماجی پہلوؤں کو دنیا کے سامنے اجاگر کرنا ہے۔
نبیل گبول نے بتایا کہ نیٹ فلکس کی ایک پروڈکشن ٹیم نے ان سے براہِ راست رابطہ کیا ہے اور لیاری پر تین سیزنز پر مشتمل ایک سیریز بنانے کی تجویز دی گئی ہے۔ ان کا کہنا تھا کہ مجوزہ سیریز میں لیاری کے سماجی، سیاسی اور تاریخی پس منظر کو اجاگر کیا جائے گا تاکہ غیر ملکی پروڈکشنز میں دکھائے گئے منفی تاثر کا ازالہ کیا جا سکے۔
پاکستان مخالف مواد پر بھارتی فلم ’’دھریندر‘‘ کے خلاف کراچی کی عدالت سے رجوع
پی پی پی رہنما کے مطابق نیٹ فلکس کی ایک ٹیم اس منصوبے کے سلسلے میں مارچ میں پاکستان کے دورے کا بھی ارادہ رکھتی ہے۔ انہوں نے کہا کہ ٹیم لیاری کے مختلف علاقوں کا جائزہ لے گی اور مقامی تاریخ و ثقافت سے متعلق مواد اکٹھا کرے گی تاکہ سیریز کو حقیقت کے قریب تر بنایا جا سکے۔
نبیل گبول نے مزید انکشاف کیا کہ نیٹ فلکس سے وابستہ ایک ہدایت کار اور پروڈیوسر نے معروف برازیلین اداکار ویگنر مورا کو سیریز میں شامل کرنے میں دلچسپی ظاہر کی ہے۔ ویگنر مورا نیٹ فلکس کی مشہور سیریز ’’نارکوس‘‘ میں پابلو ایسکوبار کے کردار سے عالمی شہرت حاصل کر چکے ہیں۔
انہوں نے کہا کہ لیاری کو بین الاقوامی سطح پر صرف جرائم اور بدامنی سے جوڑ کر دکھانا ایک منفی پروپیگنڈا ہے، جبکہ حقیقت میں یہ علاقہ اپنی ثقافتی روایات، کھیلوں خصوصاً باکسنگ اور فٹبال، اور سیاسی شعور کے حوالے سے ایک منفرد شناخت رکھتا ہے۔ نبیل گبول کے مطابق اگر یہ سیریز بنی تو یہ لیاری کے مثبت تشخص کو عالمی سطح پر اجاگر کرنے میں اہم کردار ادا کرے گی۔
