معروف اداکار گوہر رشید نے ایک انٹرویو میں انکشاف کیا ہے کہ کبریٰ خان نے شادی کی ان کی پیشکش پہلے مسترد کر دی تھی، لیکن انہوں نے حوصلہ نہیں ہارا اور آخرکار کبریٰ خان نے ہاں کر دی۔
گوہر رشید نے بتایا کہ ان دونوں کی ابتدا میں دوستی تھی اور کوئی رومانوی تعلق نہیں تھا، لیکن وقت کے ساتھ یہ دوستی محبت میں بدل گئی۔ ان کا کہنا تھا کہ وہ ہمیشہ سے مکہ مکرمہ میں نکاح کرنا چاہتے تھے اور قسمت نے انہیں وہاں ایک مقدس سرزمین پر ایک دوسرے کے ساتھ جوڑ دیا۔
اداکار نے بتایا کہ محبت کی شروعات ان کی طرف سے ہوئی اور وہ کبریٰ کی طرف ہمیشہ مائل رہے، تاہم دوست ہونے کی وجہ سے کبھی اس زاویے سے نہیں سوچا۔ کبریٰ نے شروع میں پیشکش قبول نہیں کی، مگر ان کی مسلسل کوششوں کے بعد یہ رشتہ قائم ہو گیا۔
مکہ میں کبریٰ خان کی رخصتی کی ویڈیو سوشل میڈیا پر وائرل
گوہر رشید نے دوستی پر مبنی شادی کو ایک بڑی نعمت قرار دیتے ہوئے کہا کہ اس میں اعتماد اور سمجھ بوجھ پہلے سے موجود ہوتا ہے، جو شادی کو مضبوط بناتا ہے۔ انہوں نے نوجوانوں کو مشورہ دیا کہ شادی سے پہلے اپنی دنیاوی خواہشات پوری کرلیں کیونکہ شادی ایک روحانی بندھن ہے جس میں ذمہ داری اور قربانی شامل ہوتی ہے۔
ساتھ ہی انہوں نے کہا کہ بیوی کو تحفے دینا اچھی بات ہے، مگر سب سے بڑا تحفہ اسے تحفظ اور آزادی دینا ہے تاکہ وہ خود کو محفوظ اور بااعتماد محسوس کرے۔ گوہر رشید نے کبریٰ خان کو اپنی زندگی کی سب سے بڑی نعمت قرار دیتے ہوئے اس رشتے کے لیے شکرگزاری کا اظہار کیا۔
