کراچی،سکھر میں 14 اگست 2023 کو قتل ہونے والے معروف صحافی جان محمد مہر کا قاتل شکارپور پولیس کے ساتھ مقابلے میں ہلاک ہو گیا۔
سندھ کے وزیر داخلہ ضیاء الحسن لنجار نے اس خبر کی تصدیق کرتے ہوئے بتایا کہ قاتل شیرو مہر پولیس مقابلے میں مارا گیا اور سندھ پولیس نے صحافی کے قاتل کو انجام تک پہنچا دیا۔
ادھر وزیر توانائی سندھ ناصر حسین شاہ کا کہنا تھا کہ پولیس کی بھرپور کوشش تھی کہ ملزم کو زندہ گرفتار کیا جائے۔
ڈی آئی جی لاڑکانہ ناصر آفتاب کے مطابق صحافی جان محمد مہر قتل کیس کا مرکزی کردار شیرو پولیس آپریشن کے دوران مارا گیا، جب کہ آپریشن میں ملزم کے بیٹے کے جاں بحق ہونے اور متعدد ڈاکوؤں کے زخمی ہونے کی اطلاعات بھی موصول ہوئی ہیں۔
واضح رہے کہ سندھ حکومت نے اس مرکزی ملزم کے سر کی قیمت 50 لاکھ روپے مقرر کی تھی اور واقعے کی تحقیقات کے لیے 7 رکنی مشترکہ تحقیقاتی ٹیم تشکیل دی گئی تھی، جس میں آئی ایس آئی، ایم آئی، رینجرز، ایف آئی اے سمیت مختلف اداروں کے افسران شامل تھے۔
