ٹک ٹاک نے سال 2025 کے لیے پاکستان میں سب سے زیادہ سرچ کیے جانے والے موضوعات اور شخصیات کے تفصیلی اعداد و شمار جاری کیے ہیں۔
رپورٹ کے مطابق، پاکستانی صارفین نے اس پلیٹ فارم کو صرف تفریح کے لیے نہیں بلکہ معلومات حاصل کرنے، تعلیمی رہنمائی، خریداری کے فیصلے کرنے اور نئے ہنر سیکھنے کے لیے بھی بھرپور استعمال کیا۔
صحت اور فٹنس کے حوالے سے ٹک ٹاک کی تلاش میں 66 فیصد اضافہ ہوا، جو ظاہر کرتا ہے کہ پاکستانی اپنی صحت، ورزش اور فٹنس کے بارے میں زیادہ باشعور ہو گئے ہیں۔ صارفین ورزش کے طریقے اور صحت کے متعلق ویڈیو رہنمائی کو ترجیح دے رہے ہیں، جس سے آن لائن فٹنس کمیونٹی میں اضافہ ہوا ہے۔
سیاحت اور کھانے کے شعبے میں بھی دلچسپی نمایاں رہی۔ سیاحتی مواد کی تلاش میں 53 فیصد اضافہ ریکارڈ کیا گیا، اور کھانوں سے متعلق تلاش میں 52 فیصد اضافہ ہوا۔ رپورٹ کے مطابق، سب سے زیادہ دیکھے جانے والے سیاحتی مقامات میں اسلام آباد، ہنزہ کا التت فورٹ، دریائے چناب، لاہور اور کراچی شامل ہیں۔ کھانوں میں روایتی پکوان جیسے بریانی اور آلو کے ساتھ ساتھ وائرل فوڈ ٹرینڈز جیسے لاوا برگر، ماچا ڈرنک اور دبئی چاکلیٹ نے بھی صارفین کی توجہ حاصل کی۔
جوا پروموشن کیس: یوٹیوبر ڈکی بھائی کی 10 لاکھ کے مچلکوں پر ضمانت منظور
کرکٹ کے شعبے میں پاکستانی صارفین کی دلچسپی برقرار رہی۔ سب سے زیادہ سرچ کیے جانے والے موضوعات میں بابر اعظم کی سینچری، پاکستان بمقابلہ جنوبی افریقہ اور بھارت کے میچز کے لمحات شامل ہیں۔ کھلاڑیوں میں بابر اعظم، ویرات کوہلی اور حارث رؤف سب سے زیادہ زیر بحث رہے۔ شوبز انڈسٹری میں پاکستانی ڈرامے، ترک سیریز اور ریئلٹی شوز ’تماشا‘ اور ’ہم ایوارڈز‘ سب سے زیادہ مقبول رہے۔
لائف اسٹائل اور ٹیکنالوجی کے شعبے میں خواتین نے مہندی کے ڈیزائن سرچ کیے، جبکہ ٹیکنالوجی کے شائقین نے مصنوعی ذہانت (AI)، پرامپٹس اور سافٹ ویئر اپ ڈیٹس کے بارے میں معلومات حاصل کیں۔ مصنوعات خریدنے سے پہلے پروڈکٹ ریویوز دیکھنے کا رجحان بھی بڑھا، جو صارفین کے سوچ سمجھ کر فیصلے کرنے کے رجحان کی عکاسی کرتا ہے۔
عمیس نوید، جنوبی ایشیا میں ٹک ٹاک کے کانٹینٹ آپریشنز کی سربراہ، نے کہا کہ ٹک ٹاک پاکستانی صارفین کی روزمرہ زندگی کا لازمی حصہ بن چکی ہے اور صارفین نہ صرف ویڈیوز دیکھ رہے ہیں بلکہ حقیقی وقت میں معلومات اور سیاق و سباق بھی تلاش کر رہے ہیں۔ یہ اعداد و شمار اس بات کی نشاندہی کرتے ہیں کہ پاکستانی صارفین آن لائن پلیٹ فارمز کو صرف تفریح کے لیے نہیں بلکہ زندگی کے متعدد پہلوؤں میں مدد کے لیے استعمال کر رہے ہیں۔
