پاکستان تحریک انصاف (پی ٹی آئی) کے رہنما حماد اظہر نے اپنے والد میاں اظہر کے انتقال پر اظہار تعزیت کرتے ہوئے اپنے اور اپنے خاندان کی جانب سے ہزاروں ساتھیوں، سیاسی رہنماؤں اور عوام کا شکریہ ادا کیا ہے جنہوں نے جنازے اور قرآن خوانی میں شرکت کی اور دعاؤں سے نوازا۔
حماد اظہر نے کہا کہ ان کے والد کی میراث شرافت، ایمانداری اور زہد و برداشت ہے جو صرف ان کے لیے نہیں بلکہ پورے پاکستان کے سیاسی کلچر کے لیے ایک قیمتی اثاثہ اور شاندار روایت ہے۔ انہوں نے کہا کہ وہ اپنے والدین کے اکلوتے بیٹے، تین بہنوں کے بھائی اور دو کم سن بچوں کے والد ہیں اور اس دکھ کی گھڑی میں اپنے گھر والوں، خاص طور پر اپنی والدہ کے ساتھ رہنا چاہتے ہیں، جنہوں نے پچھلے دو سال سے زائد عرصے تک تکلیف اور غم سہہ رکھا ہے۔
حماد اظہر نے اپنے خلاف لگائے گئے جعلی مقدمات اور الزامات کو بے بنیاد قرار دیتے ہوئے کہا کہ وہ عدالت سے رجوع کریں گے اور انصاف حاصل کریں گے۔ انہوں نے کہا، "اگر انصاف ملا تو اللہ کا شکر ادا کروں گا اور اگر نہیں ملا تو صبر اور استقامت کے ساتھ ظلم برداشت کروں گا کیونکہ بے شک اللہ صابرین کے ساتھ ہے۔”
یہ بیان ایسے وقت میں سامنے آیا ہے جب حماد اظہر 9 مئی کے بعد سے رو پوش تھے اور اب اپنے والد کی وفات کے بعد اپنے گھر واپس لوٹ آئے ہیں۔ ان کی غیر حاضری اور سیاسی سرگرمیوں میں کمی نے کئی سوالات کو جنم دیا تھا، تاہم اب وہ دوبارہ عوام کے سامنے آئے ہیں اور اپنے موقف کا اعادہ کیا ہے۔
حماد اظہر کی اس واپسی کو سیاسی حلقوں میں خاصی اہمیت دی جا رہی ہے، اور ان کے آئندہ سیاسی اقدامات پر سب کی نظریں مرکوز ہیں۔
