تھانہ ٹانڈہ کے علاقے بھاگووال کلاں روڈ پر قائم پولیس ناکے پر موٹر سائیکل سوار نامعلوم ڈاکوؤں نے پولیس پارٹی پر فائرنگ کر دی، جس کے نتیجے میں پولیس اہلکار اویس زمان شدید زخمی ہو گیا۔
پولیس کے مطابق اہلکاروں نے مشکوک موٹر سائیکل سواروں کو رکنے کا اشارہ کیا، جس پر ڈاکوؤں نے فوراً فائرنگ شروع کر دی۔ زخمی اہلکار کو فوری طور پر عزیز بھٹی شہید اسپتال منتقل کیا گیا، جہاں اس کا علاج جاری ہے۔
واقعے کی اطلاع ملتے ہی پولیس کی بھاری نفری موقع پر پہنچ گئی۔ ڈی پی او مستنصر عطا باجوہ نے زخمی اہلکار کی عیادت کی اور واقعے کی مکمل تحقیقات کی ہدایت جاری کی۔
ترجمان پولیس کے مطابق ملزمان کی گرفتاری کے لیے چھاپے مارے جا رہے ہیں۔ پولیس کا کہنا ہے کہ جلد ہی ملزمان کو گرفتار کر کے قانون کے کٹہرے میں لایا جائے گا۔
علاقے میں سیکیورٹی مزید سخت کر دی گئی ہے اور واقعے کی تفتیش جاری ہے۔
