روس پر یوکرین کے بڑے حملے کے بعد عالمی گولڈ مارکیٹس میں شدید اتار چڑھاؤ، فی اونس سونا 59 ڈالر اضافے سے 3347 ڈالر کا ہو گیا، پاکستان میں فی تولہ سونا 353100 روپے تک جا پہنچا۔
لاہور، عالمی اور مقامی گولڈ مارکیٹس میں سونے کی قیمت میں غیر معمولی اضافہ دیکھنے میں آیا ہے۔ روس پر یوکرین کے حالیہ بڑے حملے کے بعد عالمی منڈیوں میں بے چینی بڑھ گئی، جس کے اثرات سونے کی قیمتوں پر واضح نظر آئے۔
بین الاقوامی مارکیٹ میں فی اونس سونے کی قیمت 59 ڈالر کے نمایاں اضافے کے بعد 3347 امریکی ڈالر تک جا پہنچی۔ عالمی سطح پر سرمایہ کاروں نے سونے کو محفوظ سرمایہ کاری کے طور پر اپنایا ہے، جس کی وجہ سے طلب میں اضافہ دیکھنے میں آیا۔ عالمی و مقامی مارکیٹس میں سونے کی قیمتوں میں اضافے کی مکمل تفصیل یہاں پڑھیں۔
آل پاکستان صرافہ جیمز اینڈ جیولرز ایسوسی ایشن کے مطابق پاکستان میں بھی سونے کی قیمت میں بڑا اضافہ ریکارڈ کیا گیا ہے۔ آج 24 کیرٹ خالص سونے کے فی تولہ نرخ 5900 روپے کے اضافے کے بعد 353100 روپے ہو گئے ہیں، جبکہ دس گرام سونا 5058 روپے اضافے کے ساتھ 302726 روپے پر پہنچ گیا ہے۔
صرافہ بازاروں میں خریداروں اور تاجروں کی جانب سے بڑھتی ہوئی قیمتوں پر تشویش کا اظہار کیا جا رہا ہے، خاص طور پر شادی بیاہ کے سیزن میں سونے کی مہنگائی متوسط طبقے کے لیے مزید مشکلات کھڑی کر رہی ہے۔
یاد رہے کہ سونے کی قیمت عالمی سیاسی کشیدگی، مالیاتی غیر یقینی صورتحال اور ڈالر کی قدر سے براہ راست متاثر ہوتی ہے۔ ماضی میں بھی جنگی حالات یا عالمی معاشی بحرانوں کے دوران سونے کی قیمت میں اچانک اضافہ دیکھنے میں آیا ہے۔ روس یوکرین کشیدگی نے ایک بار پھر عالمی گولڈ مارکیٹس میں غیر یقینی کی فضا پیدا کر دی ہے۔
