فرانس نے نوجوانوں کو قومی دفاع کا حصہ بنانے کے لیے ایک نیا اور اہم قدم اٹھاتے ہوئے فوج میں رضاکارانہ بھرتیوں کا فیصلہ کیا ہے۔ حکومت کا کہنا ہے کہ اس اقدام کا مقصد نوجوان نسل کو ملک کی سلامتی اور خدمت کے عملی عمل سے جوڑنا ہے، تاکہ وہ نہ صرف پیشہ ورانہ مہارتیں سیکھ سکیں بلکہ قومی ذمہ داری کا احساس بھی مضبوط ہو۔
فرانسیسی صدر ایمانوئل ماکروں نے اعلان کیا ہے کہ آئندہ موسمِ گرما سے فوج میں نئی رضاکارانہ فوجی سروس کا آغاز کیا جائے گا۔ یہ پروگرام 18 سے 19 سال کی عمر کے نوجوان لڑکوں اور لڑکیوں کے لیے مخصوص ہوگا، جنھیں مختصر مدت کی ٹریننگ اور مقامی سطح پر خدمات کی ذمہ داریاں سونپی جائیں گی۔ صدر کا کہنا ہے کہ یہ منصوبہ نوجوانوں کے لیے ایک ایسا موقع ہوگا جس سے وہ نظم و ضبط، تعاون اور عوامی خدمت جیسے اصولوں سے براہِ راست واقف ہوں گے۔
صدر ماکروں کے مطابق یہ رضاکارانہ فوجی دستے صرف فرانس کے اندر ہی خدمات انجام دیں گے، اور ان کا کردار ملکی ضروریات کو پورا کرنے میں معاون ثابت ہوگا۔ حکومت نے 2030 تک 10 ہزار نوجوانوں کو اس پروگرام کے تحت فوج میں شامل کرنے کا ہدف مقرر کیا ہے، جس سے فوجی ڈھانچے میں ایک نئی توانائی اور معاشرتی سطح پر مثبت تبدیلی کی توقع کی جا رہی ہے۔
