ٹیسلا کے بانی اور چیف ایگزیکٹو آفیسر ایلون مسک دنیا کے پہلے سی ای او بن گئے جنہیں تقریباً ایک ٹریلین ڈالر کے معاوضے کا پیکیج منظور کیا گیا ہے۔
یہ فیصلہ کمپنی کے سالانہ جنرل اجلاس میں شیئر ہولڈرز کی اکثریت کی حمایت سے کیا گیا، جس کے بعد ہال میں زبردست تالیاں بجائی گئیں۔
اس تاریخی معاوضے کا تعلق مسک کے اگلے 10 سالوں میں ٹیسلا کی مارکیٹ ویلیو میں نمایاں اضافہ کرنے سے ہے۔ مقررہ اہداف حاصل کرنے پر انہیں سینکڑوں ملین نئے شیئرز ملیں گے، جن کی مالیت تقریباً ایک ٹریلین ڈالر تک پہنچ سکتی ہے۔
اگرچہ اس ریکارڈ توڑ معاہدے پر کچھ حلقوں میں تنقید بھی ہو رہی ہے، ٹیسلا کے بورڈ آف ڈائریکٹرز نے موقف اختیار کیا ہے کہ مسک کے بغیر کمپنی کا چلنا ممکن نہیں، اور اگر پیکیج مسترد کیا جاتا تو مسک کمپنی چھوڑ سکتے تھے۔
ایلون مسک دنیا کے پہلے 500 ارب ڈالرز کمانے والے شخص بن گئے
فیصلے کے اعلان کے بعد ایلون مسک نے آسٹن، ٹیکساس میں منعقدہ اجلاس کے اسٹیج پر آ کر خوشی کا اظہار کرتے ہوئے رقص کیا اور شرکاء نے ان کے حق میں نعرے لگائے۔ مسک نے خطاب میں کہا کہ یہ ٹیسلا کے مستقبل کا نیا باب نہیں بلکہ ایک نئی کتاب ہے، اور دیگر کمپنیوں کے شیئر ہولڈر اجلاس بورنگ ہوتے ہیں، لیکن ہمارا اجلاس شاندار ہے۔
مسک کے اہداف میں شامل ہے کہ ٹیسلا کی مارکیٹ ویلیو کو موجودہ 1.4 ٹریلین ڈالر سے بڑھا کر 8.5 ٹریلین ڈالر تک لے جایا جائے، اور 10 لاکھ خودکار روبوٹیکسی گاڑیاں کمرشل آپریشن میں لائی جائیں۔
