کلاچی میں دہشتگردی کا واقعہ، یادگار چوک پر تعینات اہلکاروں کو نشانہ بنایا گیا
ڈیرہ اسماعیل خان: تحصیل کلاچی کے یادگار چوک میں افسوسناک فائرنگ کے واقعے میں دو پولیس اہلکار شہید ہوگئے۔
پولیس کے مطابق دونوں اہلکار ڈیوٹی پر تعینات تھے اور قریبی دکان سے کچھ لینے جا رہے تھے کہ نامعلوم مسلح افراد نے ان پر اندھا دھند فائرنگ کر دی، جس کے نتیجے میں وہ موقع پر ہی شہید ہو گئے۔
واقعے کے بعد علاقے میں خوف و ہراس پھیل گیا، جبکہ پولیس اور سیکیورٹی فورسز فوری طور پر موقع پر پہنچ گئیں۔ علاقے کو گھیرے میں لے کر سرچ آپریشن شروع کر دیا گیا ہے۔ پولیس کا کہنا ہے کہ واقعے کی مکمل تحقیقات کا آغاز کر دیا گیا ہے اور حملہ آوروں کی تلاش جاری ہے۔
شہید اہلکار یادگار چوک پر تعینات تھے، جہاں سیکیورٹی خدشات کے پیش نظر پولیس کی مستقل موجودگی رکھی جاتی ہے۔ ابتدائی اطلاعات کے مطابق حملہ اچانک کیا گیا، اور دہشتگردی کا پہلو نظرانداز نہیں کیا جا سکتا۔
یاد رہے کہ خیبرپختونخوا کے جنوبی اضلاع میں سیکیورٹی فورسز اور پولیس پر حملوں میں حالیہ مہینوں میں اضافہ دیکھا گیا ہے، جس کے باعث قانون نافذ کرنے والے اداروں کی ذمہ داریاں مزید بڑھ گئی ہیں۔ پولیس حکام کا کہنا ہے کہ شہداء کی قربانیاں رائیگاں نہیں جائیں گی اور ذمہ داروں کو قانون کے کٹہرے میں لایا جائے گا۔
