ممبئی سے بھارتی میڈیا کے مطابق آئندہ ہونے والے ایشیا ہاکی کپ میں پاکستان کی شرکت ممکن نہ ہو سکی، اور اس کی جگہ بنگلہ دیش کو شامل کر لیا گیا ہے۔ ٹورنامنٹ 27 اگست سے 7 ستمبر 2025 تک بھارتی ریاست بہار کے شہر راجگیر میں منعقد ہوگا، تاہم پاکستانی حکومت نے سیکیورٹی خدشات کے پیش نظر قومی ہاکی ٹیم کو بھارت جانے کی اجازت نہیں دی۔
پاکستان ہاکی فیڈریشن کے سیکرٹری رانا مجاہد نے تصدیق کی کہ حکومت پاکستان کے فیصلے کے باعث قومی ٹیم ایونٹ میں شرکت نہیں کر رہی۔
بھارتی انتہا پسند تنظیموں کی جانب سے پاکستان ہاکی ٹیم کو سنگین نتائج کی دھمکیاں دی گئی تھیں، جس پر بھارت اور ایشین ہاکی فیڈریشن کو تحریری طور پر آگاہ بھی کر دیا گیا تھا۔ انہوں نے مزید کہا کہ بھارتی حکومت کی جانب سے کوئی باضابطہ سیکیورٹی کی یقین دہانی نہیں کروائی گئی، جبکہ کھلاڑیوں کی جان کا تحفظ فیڈریشن کی اولین ترجیح ہے۔
پاکستان ہاکی فیڈریشن نے یہ بھی شکوہ کیا کہ ایشین ہاکی فیڈریشن نے بنگلہ دیش کو شامل کرنے کے فیصلے سے پاکستان کو آگاہ نہیں کیا۔ ٹورنامنٹ میں بھارت، چین، جاپان، ملائیشیا، جنوبی کوریا، عمان، چائنیز تائپے اور بنگلہ دیش کی ٹیمیں شریک ہوں گی۔
یاد رہے کہ پاکستان نے ماضی میں بھی بھارتی سرزمین پر کھیلنے سے گریز کیا ہے، خاص طور پر ایسے مواقع پر جب انتہا پسند عناصر کی طرف سے خطرات موجود ہوں۔ تاہم رانا مجاہد کے مطابق ایشیا کپ میں شرکت نہ کرنے کے باوجود پاکستان ہاکی ٹیم کے پاس ورلڈ کپ میں کوالیفائی کرنے کے دیگر مواقع اب بھی موجود ہیں۔
