208
شنگھائی تعاون تنظیم کے سربراہی اجلاس میں شرکت کیلئے پاکستان میں آئے بیلاروس کے وزیراعظم رومان گولوف چینکو نے چیف آف آرمی سٹاف جنرل سیّد عاصم منیر سےملاقات کی۔
راولپنڈی میں چیف آف آرمی اسٹاف جنرل سید عاصم منیر سے جمہوریہ بیلاروس کے وزیراعظم رومان گولوف چینکو نے ملاقات کی۔ پاک فوج کے شعبہ تعلقات عامہ (آئی ایس پی آر) کے مطابق اس ملاقات میں علاقائی امور اور دونوں ممالک کے درمیان سیکیورٹی اور دفاعی تعاون کو فروغ دینے پر بات چیت ہوئی۔
ملاقات کے دوران آرمی چیف جنرل عاصم منیر نے عالمی اور علاقائی معاملات میں بیلاروس کے تعاون کی تعریف کی اور دونوں ممالک کے درمیان فوجی شراکت داری کو مزید مستحکم کرنے کی خواہش کا اظہار کیا۔
بیلاروس کے وزیراعظم رومان گولوف چینکو نے علاقائی امن و استحکام کے فروغ میں پاکستان کی مسلح افواج کے کردار کو سراہا اور دہشت گردی کے خلاف جنگ میں پاکستانی فوج کی پیشہ ورانہ مہارت اور قربانیوں کا اعتراف کیا۔
