عمران خان نے 9 مئی کے مقدمات میں درخواست ضمانتوں کی فوری سماعت کے لیے عدالت سے رجوع کر لیا۔
لاہور، پاکستان تحریک انصاف (پی ٹی آئی) کے بانی عمران خان نے 9 مئی کے8 مقدمات میں درخواست ضمانتوں کی جلد سماعت کے لیے لاہور ہائیکورٹ سے رجوع کر لیا۔
نجی ٹی وی چینل کے مطابق، عمران خان نے اپنے وکیل بیرسٹر سلمان صفدر کے ذریعے متفرق درخواستیں دائر کی ہیں۔ ان درخواستوں میں جناح ہاؤس حملہ کیس سمیت دیگر مقدمات شامل ہیں۔
درخواست میں مؤقف اختیار کیا گیا ہے کہ انہیں سیاسی انتقام کا نشانہ بنانے کے لیے سازش کے تحت مقدمات میں نامزد کیا گیا ہے۔
درخواست میں مزید کہا گیا کہ آٹھ مقدمات میں ضمانت کے لیے لاہور ہائیکورٹ سے رجوع کیا گیا تھا، جس پر 16 جنوری کو سماعت ہوئی تھی، تاہم پولیس کو نوٹس جاری ہونے کے باوجود درخواست ضمانتوں کو سماعت کے لیے مقرر نہیں کیا گیا۔
عمران خان کی جانب سے استدعا کی گئی کہ ان درخواستوں کو فوری طور پر سماعت کے لیے مقرر کیا جائے۔ انہوں نے مؤقف اپنایا کہ متفقہ قانونی اصول یہی ہے کہ نہ صرف انصاف فراہم کیا جائے بلکہ وہ ہوتا ہوا نظر بھی آنا چاہیے۔
عدالت سے درخواست ہے کہ 9 مئی کے آٹھ مقدمات میں ضمانت کی درخواستوں کو جلد از جلد سماعت کے لیے مقرر کیا جائے۔
