اسلام آباد، چیئرمین پیپلزپارٹی بلاول بھٹو زرداری نے کہا کہ دو تہائی اکثریت کیلئے نمبر پورے ہیں تاہم وفاقی حکومت نمبر پورے ہونے کے باوجود تمام جماعتوں سے مشاورت چاہتی ہے۔
آئینی ترمیم کے حوالے سے تحفظات، مشاورت اور تجاویز کیلئے پارلیمانی کمیٹی کا اجلاس ہوا جس میں چیئرمین بلاول بھٹو زرداری، مولانا فضل الرحمان، بیرسٹر گوہر سمیت دیگر رہنماؤں کی جانب سے شرکت کی گئی۔
اسلام آباد میں میڈیا سے گفتگوکے دوران بلاول بھٹو زرداری کا کہنا تھا کہ پارلیمانی کمیٹی کا تفصیلی اجلاس ہوا، پیپلز پارٹی کا مسودہ ہم نے کمیٹی میں پیش کیا، آئینی عدالت اور ججوں کے تقرر کے طریقہ کار سے متعلق وکلاء تنظیموں کا موقف پیش کیا گیا جبکہ حکومت نے بھی اپنی تجاویز بھی پیش کیں۔
بلاول بھٹو زرداری کا کہنا تھا کہ ہم نے یہ ڈرافٹ اسٹیٹ کے علاوہ تمام سیاسی جماعتوں کے سامنے پیش کیا۔
چئیرمین پی پی پی نے کہا کہ اپوزیشن جماعتوں نے بھی آئینی ترامیم پر تبصرہ کیا، جے یو آئی (ف) نے پیپلز پارٹی کے ساتھ مل کر متفقہ مسودہ تیار کرنے کا عزم دہرایا،قوی امید ہے کہ اپوزیشن جماعتوں کے ساتھ بامعنی گفتگو ہو گی۔
اس موقع پر وزیر قانون کا کہنا تھا کہ آج کمیٹی کے اجلاس میں کافی تجاویز سامنے آئی ہیں، سیاسی جماعتوں کے ساتھ اتفاق رائے کرکے آئینی ترامیم ہو، اسی حوالے سے کوشش کررہے ہیں اور ہم مخالفت برائے مخالفت نہیں چاہتے۔
