صوبائی وزیر صنعت وتجارت چوہدری شافع حسین نے علامہ اقبال انڈسٹریل سٹی فیصل آباد کا دورہ کیا۔
فیصل آباد، صوبائی وزیر صنعت وتجارت چوہدری شافع حسین نے علامہ اقبال انڈسٹریل سٹی فیصل آباد کا دورہ کیا۔ دورے میں ترقیاتی کاموں پر پیش رفت کا جائزہ لیا گیا۔ ایگذونوبل صنعتی یونٹ میں پیداواری عمل کا مشاہدہ کیا گیا، جبکہ مالکان اور صنعتی یونٹ کی انتظامیہ سے انڈسٹری کے مسائل پر بات چیت کی گئی۔
فیڈمک کے ہیڈ آفس میں صنعتکاروں اور ترقیاتی اداروں کے سربراہان کے مشترکہ اجلاس کی صدارت کی گئی، جہاں فیڈمک کے زیر اہتمام انڈسٹریل اسٹیٹس کے ترقیاتی امور اور صنعتکاروں کو درپیش مسائل کا تفصیلی جائزہ لیا گیا۔ چئیرمن فیڈمک، سی ای او فیڈمک، ڈپٹی کمشنر، سی پی او، سی ای او فیسکو اور متعلقہ افسران نے اجلاس میں شرکت کی، جبکہ صنعتکاروں نے مختلف محکموں سے متعلقہ مسائل سے آگاہ کیا۔
ایم تھری انڈسٹریل سٹی میں ریلوے اسٹیشن کے قیام اور بینکوں کی برانچز کھلنے سے صنعتکاروں کو سہولت ملے گی، صوبائی وزیر صنعت وتجارت چوہدری شافع حسین کے مطابق فیڈمک میں سیکیورٹی معاملات کی بہتری کیلئے ماڈل پولیس اسٹیشن بنایا جائے گا، جبکہ 100 بستروں پر مشتمل سوشل سکیورٹی کا ہسپتال بھی بنے گا۔
چوہدری شافع حسین نے کہا کہ ہائی وے ٹیکس سے متعلق حتمی فیصلہ تک صنعتکاروں کے خلاف کوئی کارروائی نہیں ہوگی۔ فیکٹریاں تحفظ ماحولیات کی ایس او پیز پر عملدرآمد یقینی بنائیں اور ہر انڈسٹری پر لازم ہے کہ ویسٹ واٹر ٹریٹمنٹ پلانٹ لگائے۔ محکمہ تحفظ ماحولیات کا عملہ فیکٹری مالکان کو ناجائز تنگ نہ کرے۔ فیڈمک ملک کی سب سے بڑی انڈسٹریل اسٹیٹ ہے، لیکن اس میں ٹیلی فون لائن تک نہیں۔
صوبائی وزیر نے انڈسٹریل اسٹیٹس میں سٹریٹ لائٹس کے بہتر نظام اور لٹکتی تاروں کو درست کرنے کی ہدایت کی۔ ماضی کی حکومتیں فیڈمک کے معاملات پر توجہ دیتیں تو ملک کی سب سے بڑی انڈسٹریل اسٹیٹ اس صورتحال سے دوچار نہ ہوتی۔
صوبائی وزیر نے ایم تھری انڈسٹریل سٹی کے ماسٹر پلان کی عدم دستیابی پر سخت اظہار ناراضگی کیا اور ذمہ داران کے خلاف کارروائی کی ہدایت دی۔ چوہدری شافع حسین نے یقین دہانی کرائی کہ صنعتکاروں کی مشاورت سے فیڈمک کے معاملات ٹھیک کرکے اسے جنوبی ایشیا کی بڑی انڈسٹریل اسٹیٹ بنائیں گے اور پنجاب کو حقیقی معنوں میں کاروباری سرگرمیوں کا مرکز بنائیں گے۔
اجلاس میں موجود چائنیز اور مقامی صنعتکاروں نے درپیش مسائل پر کھل کر اظہار خیال کیا، جبکہ صوبائی وزیر صنعت وتجارت نے جائز مسائل کے ترجیحی بنیادوں پر حل کی یقین دہانی کرائی اور بعض مسائل کے فوری حل کے لئے اجلاس میں موجود افسران کو ضروری ہدایات جاری کیں۔
