وفاقی وزیر اطلاعات و نشریات عطا تارڑ کا کہنا ہے کہ 5 آئی پی پیز سے معاہدے ختم ہو گئے ہیں اور اس اقدام سے معیشت کو اربوں روپے کا فائدہ ہوگا۔
وفاقی وزیر اطلاعات و نشریات عطا تارڑ نے قومی اسمبلی میں خطاب کرتے ہوئے کہا کہ حکومت نے پانچ آئی پی پیز (انڈیپینڈنٹ پاور پروڈیوسرز) کے معاہدے ختم کر دیے ہیں، جس سے معیشت کو اربوں روپے کا فائدہ ہوگا۔ انہوں نے مزید بتایا کہ مزید آٹھ آئی پی پیز کے بارے میں جلد خوشخبری دی جائے گی اور ان کے نرخ بھی کم کیے گئے ہیں، جس سے کئی سو ارب روپے کی بچت ہو گی۔
عطا تارڑ نے بتایا کہ وفاقی حکومت نے ایک سے 200 یونٹ تک بجلی استعمال کرنے والے صارفین کے لئے 50 ارب روپے کی سبسڈی فراہم کی ہے جبکہ پنجاب حکومت نے 201 سے 500 یونٹ تک کے صارفین کے لیے 45 ارب روپے کی سبسڈی دی ہے۔ ہر سال 300 یونٹ تک کے صارفین کو وفاقی حکومت کی جانب سے 276 ارب روپے کی سبسڈی دی جاتی ہے، جبکہ کے الیکٹرک کو 174 ارب روپے کی سبسڈی فراہم کی جا رہی ہے۔
وزیر اطلاعات نے یہ بھی کہا کہ فیول پرائس ایڈجسٹمنٹ کے ذریعے نیپرا نے 86 پیسے فی یونٹ کمی کی ہے، اور بجلی کے معاملے پر حکومت کی بھرپور توجہ ہے۔ انہوں نے بتایا کہ کیپسٹی پیمنٹس میں کمی کے لیے پانچ آئی پی پیز کو بند کیا گیا ہے، اور جولائی سے ستمبر کے دوران دی گئی سبسڈیز اور فیول کاسٹ ایڈجسٹمنٹ سے بجلی کے بلوں پر نمایاں فرق پڑا ہے۔
عطا تارڑ نے کہا کہ سردیوں میں بجلی کے بل کم آتے ہیں اور آئندہ گرمیوں سے قبل بجلی کی قیمتوں میں مزید کمی کی جائے گی۔
انہوں نے ملک کی معاشی صورتحال پر روشنی ڈالتے ہوئے کہا کہ زرمبادلہ کے ذخائر میں اضافہ ہوا ہے، سٹاک مارکیٹ نے نیا ریکارڈ قائم کیا ہے، اور شرح سود میں کمی آئی ہے، جس کے باعث معاشی اشاریئے مثبت ہیں اور ملک معاشی بحالی کی جانب گامزن ہے۔
