89
26 ویں آئینی ترمیم کے خلاف سپریم کورٹ میں ایک اور درخواست دائر کردی گئی۔ نئی درخواست ایڈووکیٹ میاں آصف کی جانب سے دائر کی گئی۔
سپریم کورٹ میں 26 ویں آئینی ترمیم کے خلاف ایک اور درخواست دائر کی گئی ہے۔ یہ نئی درخواست ایڈووکیٹ میاں آصف کی جانب سے آئین کے آرٹیکل 184(3) کے تحت دائر کی گئی ہے، جس میں وفاقی حکومت، وزارت قانون، اور اٹارنی جنرل کو فریق بنایا گیا ہے۔
درخواست میں مؤقف اختیار کیا گیا ہے کہ عدالت عظمیٰ 26 ویں آئینی ترمیم کو کالعدم قرار دے، کیونکہ پارلیمان عدلیہ کی آزادی کے خلاف کوئی ترمیم نہیں کر سکتی۔ درخواست میں کہا گیا ہے کہ عدلیہ کی آزادی آئین کے بنیادی ڈھانچے کا حصہ ہے، اور پارلیمان کی طرف سے عدالتی امور میں مداخلت انصاف کی فراہمی اور عدلیہ کی آزادی پر اثر انداز ہوتی ہے۔
واضح رہے کہ دو روز قبل بھی افراسیاب خٹک کی جانب سے 26 ویں آئینی ترمیم کے خلاف ایک درخواست دائر کی گئی تھی، جس میں ن لیگ، پیپلز پارٹی سمیت تمام بڑی سیاسی جماعتوں کو فریق بنایا گیا تھا۔
