26 ویں آئینی ترمیم سپریم کورٹ لاہور رجسٹری میں چیلنج کردی گئی۔
لاہور: 26 ویں آئینی ترمیم کو سپریم کورٹ لاہور رجسٹری میں چیلنج کر دیا گیا ہے۔ درخواست میں وفاقی حکومت اور وزارت قانون کو فریق بنایا گیا ہے، جس میں درخواست گزار نے یہ مؤقف اپنایا ہے کہ کسی بینچ کو خاص قسم کے مقدمات کی سماعت سے روکنے کا اقدام عدلیہ کی خود مختاری میں رکاوٹ کے مترادف ہے۔
درخواست گزار کا کہنا ہے کہ 3 سینئر ترین ججز میں سے کسی کا تقرر اور 65 سال کی عمر سے قبل ججز کو ریٹائر کرنے کا اصول بنانا عدلیہ کی خود مختاری کو متاثر کرتا ہے، جو آئین کے بنیادی ڈھانچے کے خلاف ہے۔ مزید برآں، الیکشن کمشنر کو نیا کمشنر تعینات ہونے تک توسیع دینا غیر جمہوری عمل ہے اور آئین کے منافی ہے۔
درخواست میں عدالت سے استدعا کی گئی ہے کہ ترامیم کے سیکشن 8، 9، 10، 13، 14، 17، 18 اور 22 کو ماورائے آئین قرار دے کر کالعدم قرار دیا جائے اور 26 ویں آئینی ترامیم کا گزٹڈ نوٹیفکیشن معطل کیا جائے۔
