مولانا فضل الرحمان نے کہا ہے کہ افغانستان سے ناراضی کچھ اور ہے مگر غصہ مہاجرین پر اتارا جا رہا ہے، افغانستان سے کوئی مسئلہ ہے تو بات چیت کی جائے۔
پشاور میں جمعیت علمائے اسلام (ف) کے سربراہ مولانا فضل الرحمان نے نیوز کانفرنس سے خطاب کرتے ہوئے وفاقی حکومت کی جانب سے مائنز اینڈ منرلز بل کو صوبائی خودمختاری کے خلاف قرار دیا، انہوں نے کہا کہ یہ بل صوبوں کے وسائل پر وفاق کی یکطرفہ قبضے کی کوشش ہے، جو آئین کے منافی ہے۔
مولانا نے خبردار کیا کہ اگر حکومت نے ہوش کے ناخن نہ لیے تو ہمیں پھر میدان میں آنا ہوگا۔
مولانا فضل الرحمان نے بلوچستان اسمبلی میں پارٹی اراکین کی جانب سے بل کی حمایت پر سخت نوٹس لیتے ہوئے ان سے وضاحت طلب کی ہے، کیونکہ یہ پارٹی پالیسی کی خلاف ورزی ہے۔
انہوں نے کہا کہ معدنیات پر قانون سازی صوبوں کی رضا مندی کے بغیر نہیں ہونی چاہیے، اور ہمارے مفادات اور وسائل محفوظ ہونے چاہئیں۔
افغان مہاجرین کے حوالے سے مولانا نے کہا کہ ان کی بے دخلی کا شیڈول بیٹھ کر طے کیا جائے، اور افغانستان کے ساتھ مذاکرات کا راستہ اختیار کیا جائے۔
انہوں نے کہا کہ خیبر پختونخوا میں حکومت کی رٹ ختم ہوچکی ہے، اور علما کرام و سیاسی کارکنوں کو نشانہ بنانا تشویشناک ہے۔
مولانا فضل الرحمان نے اعلان کیا کہ 27 اپریل کو مینار پاکستان پر اسرائیل کے خلاف مارچ ہوگا، جس میں فلسطینی بھائیوں سے بھرپور یکجہتی کا مظاہرہ کیا جائے گا۔
