اسلام آباد، حکومتی مذاکراتی ٹیم کے ترجمان عرفان صدیقی کی جانب سے پی ٹی آئی چیئرمین کی آرمی چیف سے ملاقات پر بیرسٹر گوہر کو پیغام دیا گیا کہ 2 یا 3 دروازوں سے مذاکرات بیک وقت نہیں چلا کرتے۔
ایک بیان میں لیگی سینیٹر عرفان صدیقی کا کہنا ہے کہ مجھے بیرسٹر گوہر کی آرمی چیف سے ملاقات کی تفصیل اور مکالموں کا علم ہے، بیرسٹر گوہرکا کہنا ہے کہ براہ راست اعلیٰ ترین فوجی سطح پر بات شروع ہوگئی ہے جو اطمینان بخش ہے، بیرسٹر گوہر کے مطابق بیک ڈور پراسیس بھی چلے گا اور فرنٹ ڈور پراسیس بھی۔
عرفان صدیقی کا کہنا ہے کہ 2،3 دروازوں سے مذاکرات بیک وقت نہیں چلا کرتے لہٰذا اب چھوٹے چھوٹے دروازوں، کھڑکیوں اور روشن دانوں میں جھانکنے کا کوئی فائدہ نہیں، اگر وہ دروازہ کھل گیا ہے جس کے لیے سال سے کوشاں تھے تو یہ کوشش چھوڑ دیں۔
عرفان صدیقی نے کہا کہ بانی پی ٹی آئی عمران خان اور علیمہ خان بھی آرمی چیف سے بیرسٹر گوہر کی ملاقات کو خوش آئند قرار دے رہے ہیں۔
دوسری جانب صوبائی مشیر اطلاعات بیرسٹرسیف نے کہا کہ پی ٹی آئی اور عسکری قیادت کے درمیان ملاقات کے بعد سابق وزیراعظم کیمپ میں کھلبلی مچ گئی ہے، اطلاعات ہیں نوازشریف نے اپنی ٹیم کو مذاکرات ناکام بنانے کا مشن سونپ دیا ہے، حکومتی مذاکراتی کمیٹی کو غیر موثر بنانے کا کام شروع ہو چکا ہے۔
