اسلام آباد، سابق وزیراعظم شاہد خاقان عباسی کی جانب سے حکومتی اقدامات پر تنقید کرتے ہوئے کہا گیا کہ چوری کے ذریعے حکومت میں آنے والے آئین سے ڈرتے ہیں۔
اسلام آباد میں تحریک تحفظ آئین پاکستان کے رہنماؤں کے ساتھ پریس کانفرنس سے خطاب کے دوران سابق وزیراعظم شاہد خاقان عباسی کا کہنا ہے کہ ہم نے پریس کانفرنس کے لیے ہال بک کروایا لیکن وہاں اجازت نہیں دی گئی۔
شاہد خاقان عباسی کا کہنا ہے کہ ہم نے ایک اور مارکی میں انتظام کیا، ہمیں کہا گیا یہاں سے ٹیم گزرتی ہے ہم نے ایک اور جگہ پر ہال لیا وہاں بھی نہیں چھوڑا گیا، یہ کوئی جلسہ نہیں تھا بلکہ یہ ایک کانفرنس تھی۔
سابق وزیراعظم نے کہا کہ ہم ملک میں آئین کی بالادستی کی بات کر رہے ہیں، ہم نے میڈیا، دانش وروں اور وکلا کو دعوت دی تھی۔
شاہد خاقان عباسی کا کہنا ہے کہ چوری کے ذریعے حکومت میں آنے والے آئین سے ڈرتے ہیں، یہ ایک کانفرنس سے ڈرتے ہیں، کل یہ کانفرنس جہاں بھی ہو ضرور ہوگی۔
سابق وزیراعظم کا کہنا ہے کہ قانون کی حکمرانی اور ترقی کی بات کی جائے گی، انہی کانفرنسوں کے ذریعے ملک سے انتشار ختم ہوتا ہے، کل کھل کر آئین کے حوالے سے بات کریں گے۔
سربراہ تحریک تحفظ آئین پاکستان محمود خان اچکزئی کا کہنا ہے کہ کسی کو اچھا لگے یا برا یہ روایات ہم نے توڑنی ہیں، آئین سے کھیلنے والوں کو کوئی سزا نہیں ملتی، یہ حکمران ناجائز ہیں، ہمیں مجبور کیا گیا تو اسمبلی کی کارروائی نہیں کرنے دیں گے۔
محمود خان اچکزئی کا کہنا ہے کہ ہم پھر فارم 45 والوں کی اسمبلی بلائیں گے، ہم پھر پیکا ایکٹ اور 26 ویں ترمیم ختم کریں گے۔
