لاہور، 5 اکتوبر کو جلاؤ گھیراؤ اور تشدد کے 3 مقدمات میں سلمان اکرم راجہ، ضمیر جھنڈو اور علی امتیاز وڑائچ سمیت دیگر کو پولیس رپورٹ میں قصور وار قرار دے دیا گیا۔
انسداد دہشت گردی عدالت میں 5 اکتوبر کو جلاؤ گھیراؤ اور تشدد کے 3 مقدمات میں سلمان اکرم راجہ، ضمیر جھنڈو اور علی امتیاز وڑائچ سمیت دیگر کی عبوری ضمانتوں پر سماعت ہوئی۔
سماعت کے موقع پر سلمان اکرم راجہ سمیت دیگر ملزمان کی جانب سے عدالت میں پیش ہوکر حاضری مکمل کروائی گئی۔
دوران سماعت پولیس کی جانب سے تھانہ اسلام پورہ کے مقدمے کی رپورٹ پیش کردی گئی، جس میں پولیس نے سلمان اکرم راجہ سمیت 7 ملزمان کو قصور وار قرار دیا۔
عدالت کی جانب سے اسلام پورہ تھانہ کے مقدمے میں آئندہ سماعت پر دلائل طلب کرتے ہوئے تھانہ مستی گیٹ اور لاری اڈا کے مقدمات میں بھی تفتیشی رپورٹ طلب کر لی گئی ہے۔
اسکے بعد انسداد دہشت گردی عدالت نے ملزمان کی عبوری ضمانتوں میں 12 اپریل تک توسیع کرتے ہوئے کیس کی سماعت ملتوی کر دی۔
اسی دوران تھانہ شفیق آباد میں 5 اکتوبر کو پولیس تشدد اور جلاؤ گھیراؤ کے مقدمے میں پولیس نے انسداد دہشت گردی عدالت میں جج منظر علی گل کے روبرو رپورٹ پیش کی، جس میں سلمان اکرم راجہ، علی امتیاز وڑائچ، شبیر گجر سمیت دیگر کو قصور وار قرار دیا گیا۔
عدالت نے ملزمان سلمان اکرم راجہ، شبیر گجر سمیت دیگر کی ضمانتیں1،1 لاکھ روپے کے مچلکوں کے عوض منظور کرلیں۔
