ماہرین فلکیات کی جانب سے ایک ایسا اسٹرکچر دریافت کیا گیا ہے جو انکے خیال میں ہماری کائنات کا اب تک دریافت ہونے والا سب سے بڑا اسٹرکچر ہے، اس اسٹرکچر کو Quipu کا نام دیا گیا ہے۔
یہ اسٹرکچر 1 ارب 30 کروڑ نوری برسوں جتنے فاصلے تک پھیلا ہوا ہے، یعنی ملکی وے نامی کہکشاں سے 13 ہزار گنا زیادہ بڑا ہے۔
یاد رہے کہ ملکی وے کہکشاں میں ہمارا نظام شمسی بھی واقع ہے۔
اس اسٹرکچر کی دریافت سے متعلق تحقیق کے نتائج ایک پری پرنٹ ویب سائٹ ArXiv میں شائع ہوئے، تحقیق کے دوران ماہرین نے نہ صرف Quipu بلکہ دیگر 4 بڑے اسٹرکچرز بھی دریافت کیے۔
مگر ان میں Quipu سب سے بڑا اسٹرکچر ہے کیونکہ اسے اسکائی میپس میں آسانی سے دیکھا جاسکتا ہے۔
محققین کے خیال کے مطابق یہ اسٹرکچر اربوں سال قبل اس وقت بنا ہوگا جب کائنات اپنے ابتدائی برسوں سے گزر رہی تھی۔
اس طرح کے اسٹرکچرز اکثر کہکشاؤں کے مجموعے، گروپس اور دیگر سے منسلک ہوتے ہیں، ہماری ملکی وے کہکشاں بھی Laniakea نامی اسٹرکچر کا حصہ ہے۔
محققین کا بتانا ہے کہ اس طرح کے اسٹرکچرز کہکشاؤں کی مخصوص گردش میں اہم کردار ادا کرتے ہیں، مگر اس حوالے سے مزید تحقیق کی ضرورت ہے۔
تحقیق کے مطابق اس طرح کے اسٹرکچرز ہمیشہ برقرار رہنے والے نہیں بلکہ مستقبل میں یہ چھوٹے ٹکڑوں میں تقسیم ہوسکتے ہیں۔
