ڈی ایس پی ٹریفک گجرات رضا حسنین اعوان نے کہا ہے کہ ضلع میں ٹریفک کی روانی کو مثالی بنانے کے لیے سخت اقدامات کیے جا رہے ہیں۔
گجرات، (نیوز الرٹ) ڈی ایس پی ٹریفک گجرات رضا حسنین اعوان نے کہا ہے کہ ضلع میں ٹریفک کی روانی کو مثالی بنانے کے لیے سخت اقدامات کیے جا رہے ہیں، اور ٹریفک قوانین کی خلاف ورزی کرنے والوں کے خلاف کارروائی کی جائے گی۔
یہ بات انہوں نے مرکزی انجمن تاجران گجرات کے صدر جاوید بٹ کی قیادت میں تاجر برادری کے وفد سے ملاقات کے دوران کہی۔ ملاقات میں کوٹلہ، کھاریاں، جلالپور جٹاں سمیت مختلف علاقوں کے تاجر بھی شریک تھے۔
ڈی ایس پی ٹریفک کا کہنا تھا کہ گجرات میں ٹریفک کے مسائل سنگین ہیں، لیکن بہتری کے لیے عملی اقدامات شروع کر دیے گئے ہیں۔ تاجر برادری کی جانب سے جی ٹی روڈ پر یوٹرن بنانے کی تجویز دی گئی، جسے ڈی ایس پی ٹریفک نے مثبت قرار دیا۔ تاہم، اس کی حتمی منظوری ڈی سی گجرات چوہدری صفدر حسین ورک دیں گے۔
تاجر برادری کا تعاون ناگزیر
ڈی ایس پی ٹریفک نے تاجروں سے اپیل کی کہ وہ سڑکوں پر تجاوزات نہ کریں تاکہ ٹریفک کی روانی برقرار رہے۔ ان کا کہنا تھا کہ بہترین نتائج کے لیے عوام اور تاجروں کا تعاون ضروری ہے۔
مرکزی انجمن تاجران کے صدر جاوید بٹ نے ملاقات کو بامقصد قرار دیا اور امید ظاہر کی کہ گجرات میں ٹریفک نظام میں نمایاں بہتری آئے گی۔ اس موقع پر خادم حسین سلیمی نے بھی ڈی ایس پی ٹریفک کی کارکردگی کو سراہا اور مکمل تعاون کی یقین دہانی کرائی۔
