اسلام آباد، عدالت نے اسلحہ اور شراب برآمدگی کیس میں علی امین گنڈاپور کے وارنٹ گرفتاری برقرار رکھے ہیں۔
اسلام آباد کی ڈسٹرکٹ اینڈ سیشن عدالت کے جج مبشرحسن چشتی کی جانب سے علی امین گنڈاپور کے خلاف غیر قانونی اسلحہ اور شراب برآمدگی کیس کی سماعت کی گئی۔
کیس کی سماعت میں عدالت نے وارنٹ گرفتاری کی تعمیل نہ ہونے پر برہمی کا اظہار کرتے ہوئے وکیل سے کہا کہ ہر تاریخ پر آپ استثناء کی درخواست دیتے ہیں، ملزم کو پیش نہیں کرتے۔
سیشن جج کا کہنا ہے کہ آپ استثناء کی درخواستیں دیکر صرف عدالت کا قیمتی وقت ضائع کرتے ہیں، وزیراعلیٰ علی امین گنڈاپور کے متعدد وارنٹ جاری ہوئے، تعمیلی رپورٹ جمع نہیں کرائی جارہی، اس پر وکیل صفائی نے کہا کہ آپ بریت کی درخواست پر پہلے فیصلہ کریں، اس متعلق عدالتی حکم موجود ہے۔
اسکے بعد عدالت نے علی امین گنڈاپور کی حاضری سے استثناء کی درخواست مسترد کرتے ہوئے ان کے وارنٹ گرفتاری برقرار رکھے اور انہیں 29 جنوری تک عدالت میں پیش کرنے کا حکم دیا۔
