لاہور، وزیراعلیٰ پنجاب مریم نواز کا کہنا ہے کہ بریل سسٹم بصارت سے محروم افراد کے لیے علم و شعور کی روشنی فراہم کرنے کا مؤثر ذریعہ ہے۔
بصارت سے محروم سپیشل ہیروز کے لئے مخصوص ورلڈ بریل ڈے پر خصوصی پیغام میں وزیراعلیٰ پنجاب مریم نواز نے کہا کہ پنجاب میں جدید ٹیکنالوجی سے آراستہ بریل پریس کام کررہے ہیں، بریل پریس کی اپ گریڈیشن سے خصوصی افراد کو عالمی معیار کا تعلیمی مواد مہیا کرنا ممکن ہے۔
مریم نواز کا کہنا ہے کہ صوبائی دارالحکومت لاہور اور بہاولپور کے بریل پرنٹنگ پریس کے ذریعے صوبہ بھر میں سرکاری و نجی اداروں کو مفت کتابیں مہیا کی جا رہی ہیں، رواں سال پنجاب بھر میں 3 ہزار سے زائد خصوصی بچوں کو انرول کیا گیا، بصارت سے محروم طلبہ کو 15 ہزار سے زائد بریل بکس فراہم کی جا چکی ہیں۔
وزیراعلیٰ کا کہنا تھا کہ خصوصی طلبہ کو قرآن پاک بھی بریل میں مہیا کیا جارہا ہے، خصوصی طلبہ کی تعلیمی ضروریات کو مدنظر رکھتے ہوئے معاون آلات فراہم کیے جا رہے ہیں، خصوصی افراد کو تعلیمی ضروریات پوری کرنے کیلئے مزید وسائل فراہم کریں گے، محکمہ سپیشل ایجوکیشن کو بنیادی اصلاحات کرکے جدید خطوط پر استوار کیا جارہا ہے۔
مریم نواز کا کہنا ہے کہ خصوصی تعلیم کے اداروں کو سہولتوں کی کمی پوری کرکے اپ گریڈ کررہے ہیں، خصوصی افراد کے معاشی مسائل میں کمی لانے کیلئے ہمت کارڈ کے ذریعے مالی امداد فراہم کی جا رہی ہے، سماعت سے محروم بچوں کو سماجی و تعلیمی سرگرمیوں میں بھرپور شرکت کے لیے معاون آلات فراہم کیے گئے ہیں۔
پاکستان کے پہلے آٹزم سکول پر کام تیزی سے جاری ہے جو جلد مکمل ہو جائے گا، سپیشل ہیروز کی زندگی میں آسانیاں پیدا کرنا اولین ترجیحات میں شامل ہے، پاکستان کی بلائنڈ کرکٹ ٹیم نے ملک و قوم کا نام روشن کیا ہے۔
