سابق ہیڈ کوچ پاکستان ریڈ بال ٹیم جیسن گلیسپی نے کوچنگ سے مستعفی ہونے کی وجوہات بتا دیں۔
غیر ملکی میڈیا کو انٹرویو دیتے ہوئے جیسن گلیسپی کا کہنا ہے کہ ہائی پرفارمنس کوچ ٹم نیلسن کے معاملے پر بے خبری ناراضی کا سبب بنی، ٹم نیلسن کو نہ رکھنے کے فیصلے سے مجھے مکمل بے خبر رکھا گیا۔
سابق ہیڈ کوچ پاکستان کا کہنا تھا کہ نیلسن کے معاملے کے بعد لگا کہ میرا کام اب مشکل ہوگیا ہے، ایک اہم فیصلے سے ہیڈ کوچ کو آگاہ نہ رکھنے نے مجھے ایسا سوچنے پر مجبور کیا۔
جیسن گلیسپی کا کہنا تھا کہ ماضی کے چند واقعات نے مجھے سوچنے پر مجبور کیا کہ میری ضرورت ہے یا نہیں، میرا پاکستان کی کوچنگ کا جو مقصد تھا وہ فوت ہوتا جارہا تھا، میرا کام صرف میچ کی صبح کھلاڑیوں کو کیچنگ پریکٹس کرانا رہ گیا تھا۔
سابق کوچ نے کہا کہ ہیڈ کوچ کا سلیکٹرز سمیت ہر کسی سے مکمل رابطہ ضروری ہوتا ہے، پلاننگ کے لیے ضروری ہے کہ کم از کم 1 روز پہلے تو مجھے اسکواڈ کے بارے میں بتایا جائے، ان تمام معاملات کی عدم موجودگی میں کام کرنا بہت مشکل ہوگیا تھا۔
گلیسپی نے کہا کہ برطانیہ کے خلاف پہلے میچ کے بعد گروپ پر ایک ٹیکسٹ میسج سے نئی سلیکشن کمیٹی کی خبر ملی، سلیکشن کمیٹی کے معاملے پر بھی مجھ سے کوئی بات نہیں کی گئی تھی جب کہ سابق کپتان بابر اعظم کو ڈراپ کرنے کا فیصلہ بھی نئی سلیکشن کمیٹی کا تھا۔
