اسلام آباد، سیکرٹری بینظیر انکم سپورٹ پروگرام نے صارفین کے بینک اکاؤنٹس کھولنے کا اعلان کردیا۔
چیئرمین میر غلام علی کی زیر صدارت قومی اسمبلی کی تخفیف غربت کمیٹی کا اجلاس ہوا، جس میں بینظیر انکم سپورٹ پروگرام کے حوالے سے معاملات پر بحث کی گئی۔
بی آئی ایس پی حکام کی جانب سے کمیٹی کو بریفنگ میں بتایا گیا کہ بینظیر انکم سپورٹ پروگرام کی بینفشریز میں سے 1 لاکھ 30 ہزار خواتین کے تھمب (انگوٹھے) کام نہیں کرتے، ان خواتین کو جنوری میں خصوصی کارڈ جاری کریں گے۔
بینفشریز کو رقم اکاؤنٹ میں دینے کے معاملے پر حکام کا کہنا ہے کہ تمام بینکوں کی ملک بھر میں مجموعی طور پر 17 ہزار برانچز ہیں مگر ان میں سے زیادہ تر برانچز شہروں میں ہیں جب کہ پروگرام کے زیادہ تر بینفشریز دیہاتوں سے تعلق رکھتے ہیں اس لیے مشکلات ہونگی۔
انکم سپورٹ پروگرام کے حکام کی جانب سے تجویز دی گئی ہے کہ پوائنٹ آف سیل ایجنٹس کے ذریعے رقم فراہمی جاری رکھی جائے۔
اس پر چیئرمین کمیٹی میر غلام علی کا کہنا ہے کہ جس چیز میں انسانی ٹچ آجائے وہاں گڑ بڑ ہوجاتی ہے، بے نظیر انکم کا سسٹم آٹو میشن پر ہونا چاہیے۔
کمیٹی کو بریفنگ دیتے ہوئے سیکرٹری انکم سپورٹ پروگرام نے بتایا کہ ہر صارف کا بینک اکاؤنٹ کھولا جائے گا جس کے بعد بینیفشریز بینکوں کی برانچز سے بھی رقم لے سکیں گے، یہ بہت بڑی کامیابی ہوگی، بینفشریز کے بینک اکاؤنٹ کھولنے سے متعلق شہری علاقوں میں پہلا پائلٹ پروجیکٹ شروع کرنے جارہے ہیں جو 3 مہینوں کیلئے ہوگا۔
سیکرٹری کے مطابق صارفین کے لیے دیگر بینکوں سے رقم وصولی کی سہولیات پر کام کررہے ہیں، ہماری کوشش ہے کہ بے نظیر انکم بینفشریز کسی بھی بینک سے پیسے نکال سکیں۔
