اسلام آباد، وفاقی وزیر قانون، انصاف و انسانی حقوق سینیٹر اعظم نذیر تارڑ کا کہنا ہے کہ آئین پاکستان ملک میں بسنے والی تمام قومیتوں کو مساوی حقوق فراہم کرتا ہے۔
وفاقی وزیر قانون سینیٹر اعظم نذیر تارڑ نے وزارت اطلاعات و نشریات اور پاکستان نیشنل کونسل آف آرٹس (پی این سی اے) کے تعاون سے ”دی اسلام آباد کرسچین فیلوشپ‘‘ کے زیراہتمام کرسمس کے حوالہ سے منعقدہ تقریب سے خطاب کے دوران کہا کہ بانی پاکستان قائداعظم محمد علی جناح نے بھی اقلیتوں کو مساوی حقوق کی فراہمی کی یقین دہانی کرائی۔
وزیر قانون کا کہنا تھا کہ مسیحی برادری پاکستان کی تعمیر و ترقی میں بھرپور کردار ادا کر رہی ہے، حکومت اقلیتوں کے حقوق کے تحفظ کیلئے ہر ممکن اقدامات اٹھا رہی ہے۔
اعظم نذیر تارڑ نے کہا کہ مسیحی برادری کیلئے کرسمس کے موقع پر خوشی کی خبر بھی شیئر کرنا چاہتا ہوں کہ اقلیتوں کے دیرینہ مطالبہ پر پہلا قومی اقلیتی کمیشن تشکیل دیا جا رہا ہے جسے گزشتہ روز وفاقی کابینہ میں پیش کر دیا گیا ہے۔
وزیر قانون کا کہنا تھا کہ یہ پہلا قومی اقلیتی کمیشن مکمل بااختیار ہوگا تاکہ قوانین پر عملدرآمد کو یقینی بنایا جا سکے، انہوں نے کہا کہ ”دی اسلام آباد کرسچین فیلوشپ‘‘کو اس کامیاب تقریب کے انعقاد اور مسیحی برادری کو ان کے مذہبی تہوار کی مبارکباد پیش کرتا ہوں۔
