لاہور، وزیراعظم محمد شہباز شریف کا کہنا ہے کہ دہشت گردی ناسور بن چکی، خاتمے کیلئے ہمارا عزم پختہ ہے۔
پاکستان نیول وار کالج لاہور میں ساتویں میری ٹائم سکیورٹی ورکشاپ میں خطاب کے دوران وزیراعظم محمد شہباز شریف نے کہا کہ پاک بحریہ ہر طرح کے چیلنجز سے نمٹنے کی بھرپور صلاحیت رکھتی ہے۔
وزیراعظم کا کہنا تھا کہ پاک بحریہ کے بہادر افسر اور جوان پاکستان کی سمندری حدود کا تحفظ یقینی بنا رہے ہیں۔
شہباز شریف کا کہنا تھا کہ آج کے دور میں بلیو اکانومی کو مرکزی حیثیت حاصل ہے، بلیو اکانومی سے ہی ہماری ترقی و خوشحالی ممکن ہے، گوادر کی بندرگاہ ایک مرکزی حیثیت رکھتی ہے۔
وزیراعظم پاکستان نے کہا کہ دہشت گردی کے ناسور کے خاتمے کے لیے ہمارا عزم پختہ ہے، امن وامان کو یقینی بنانے کے حوالے سے ایپکس کمیٹی کے اجلاس ہوئے، پاکستان میں فول پروف سکیورٹی چاہتے ہیں تاکہ لوگ اپنی صلاحیتوں سے بھرپور استفادہ کرسکیں۔
شہباز شریف نے کہا کہ دہشت گردی کی لعنت ختم کیے بغیر چین سے نہیں بیٹھیں گے، ہماری سکیورٹی فورسز دہشت گردی کے خلاف روزانہ قربانیاں دے رہی ہیں، دہشت گردی کے خلاف جنگ میں 80 ہزارافراد شہید ہوئے۔
وزیراعظم پاکستان نے کہا کہ حکومت اور افواج پاکستان دہشت گردی کے خاتمے کے لیے پرعزم ہیں، 2018 میں ہم نے پاکستان سے دہشت گردی کا مکمل خاتمہ کردیا تھا، بدقسمتی سے دہشت گردی کے ناسور نے اب دوبارہ سر اٹھایا ہے۔
