178
وزیرِ اطلاعات پنجاب عظمیٰ بخاری کا کہنا ہے کہ ملکی تاریخ میں کوئی انقلاب اتنی جلدی نہیں بھاگا جتنی جلد کل پی ٹی آئی والے بھاگے۔
تحریک انصاف نے 5 مرتبہ احتجاج کی کال دی اور یہ لوگ ہر بار ناکام ہوئے،9 مئی ہو یا پھر 24 نومبر ان کا ہر احتجاج ہی ناکام ہوا ہے۔
لاہور میں پریس کانفرنس کرتے ہوئے صوبائی وزیراطلاعات کا کہنا تھا کہ پی ٹی آئی کے احتجاج کو پنجاب کے عوام نے مسترد کر دیا۔ عمران خان کی اہلیہ بشریٰ بی بی گزشتہ رات مظاہرین کو اکیلے چھوڑ کر احتجاج سے فرار ہو گئیں۔
وزیراعلیٰ کے پی کے علی امین گنڈاپور کو کارکنوں کی جانب سے مسلسل تنقید کا سامنا کرنا پڑا۔ کہا جاتا رہا بانی پی ٹی آئی کی اہلیہ بشریٰ بی بی کا سیاست سے تعلق نہیں لیکن وہ کل اپنے شوہر کی رہائی کے لیے بضد تھیں۔
صوبائی وزیر کا مزید کہنا تھا کہ پی ٹی آئی کے احتجاج کے دوران پنجاب پولیس کی 22 گاڑیوں کو نقصان پہنچایا گیا۔
گزشتہ روز احتجاج کے دوران پکڑے گئے افغان شہریوں کا ریکارڈ بھی جلد میڈیا کے سامنے لایا جائے گا۔
