111
کراچی، سرکاری میڈیکل اور ڈینٹل کالجز اور جامعات میں داخلوں کے لیے ایم ڈی کیٹ ٹیسٹ میں 97 فیصد نمبر لینے والے طلبا کو ایف آئی اے کی جانب سے طلب کرلیا گیا۔
ایم ڈی کیٹ میں 97 فیصد نمبر لینے والے طلبا کو ایف آئی اے سائبر کرائم کراچی میں طلب کیا گیا ہے۔ ایف آئی اے نے جاری کردہ نوٹس میں یہ کہا ہے کہ طلبا یکم نومبر کو دن 12 بجے ایف آئی اے سائبر کرائم سرکل میں پیش ہوں۔
جاری کردہ نوٹس میں یہ کہا گیا ہے کہ عملی طور پر کسی بھی طالب علم کے لیے اتنے زیادہ نمبر حاصل کرنا کسی صورت میں ممکن ہی نہیں ہے، شبہات ہیں کہ طلبا پرچہ لیک ہونے میں ملوث اور حقائق سے واقفیت رکھتے ہیں۔
ڈپٹی ڈائریکٹر ایف آئی اے سائبرکرائم نے کہا کہ منصفانہ عمل کے لیے طلبا کا بیان ریکارڈ کیا جائے گا۔
سائبرکرائم حکام کا کہنا ہے کہ دفتر میں طلبا کا فرضی امتحان بھی لیا جاسکتا ہے، ریکارڈ پر دستیاب شواہد کی بنیاد پر قانونی کارروائی کی جائے گی۔
حکام کا کہنا ہے کہ طلب کیے گئے طلبا کا تعلق مختلف اعلیٰ ثانوی تعلیمی بورڈز سے ہے۔
