ہوٹل سے لائی گئی مضر صحت بریانی کھانے سے دو کمسن بہن بھائی جاں بحق ہوگئے۔
گوجرانوالہ: عالم چوک کے قریب ہوٹل کی بریانی کھانے سے دو کمسن بہن بھائی عبدالہادی اور خضرہ جاں بحق ہو گئے۔ پولیس کے مطابق بچوں کے والد مبشر نے رات کو قریبی ہوٹل سے بریانی خریدی تھی، جو اہل خانہ نے سحری میں کھائی۔ کھانے کے کچھ دیر بعد دونوں بچوں کی طبیعت بگڑ گئی، جس پر انہیں فوری طور پر ڈاکٹر کے پاس لے جایا گیا، لیکن وہ جانبر نہ ہو سکے۔
واقعے کی اطلاع ملتے ہی پولیس موقع پر پہنچی اور لاشوں کو تحویل میں لے کر پوسٹ مارٹم کے لیے اسپتال منتقل کر دیا۔ پولیس کے مطابق مبشر کی دو شادیاں ہیں، اور معاملہ بظاہر مشکوک لگتا ہے۔ تحقیقات کے دوران یہ سوال بھی اٹھایا جا رہا ہے کہ بریانی سب نے کھائی تھی، تو صرف بچے ہی کیوں متاثر ہوئے؟
بچوں کے والدین نے کسی پر شک ظاہر نہیں کیا، جس کے باعث تاحال مقدمہ درج نہیں کیا گیا۔ پولیس نے کھانے کے نمونے لیبارٹری بھیج دیے ہیں، اور رپورٹ کا انتظار کیا جا رہا ہے۔ ابتدائی طور پر واقعے کی رپورٹ زیر دفعہ 174 درج کر کے قانونی کارروائی مکمل کر لی گئی ہے۔ پوسٹ مارٹم رپورٹ آنے کے بعد مزید حقائق سامنے آئیں گے۔
