سائنسدانوں نے گنج پن کا نیا علاج دریافت کر لیا ہے۔ ان کا کہنا ہے کہ اس نئے علاج سے مردانہ گنج پن کو ختم کرنا اب ممکن ہے اور یہ مکمل قدرتی ہے۔
غیر ملکی میڈیا کے مطابق یہ تحقیق برطانیہ میں کی گئی ہے اور اس میں یہ بات سامنے آئی ہے کہ انسانی جسم میں قدرتی طور پر موجود شوگر کی مدد سے گنج پن کا علاج کیا جا سکتا ہے۔
اس نئی تحقیق کے مطابق انسانی جسم میں موجود شوگر بالوں کو نہ صرف مظبوط رکھنے بلکہ ان کو اگانے کے لئے بھی مددگار ثابت ہوگا۔
یہ تحقیق یونیورسٹی آف شیفیلڈ کے سائنس دانوں نے پاکستانی ساتھیوں کے ساتھ مل کر کی ہے اور یہ دریافت کیا ہے کہ "2-ڈی آکسی-ڈی-رائبوز” (2dDR) نامی قدرتی شوگر کی معمولی مقدار کے استعمال سے چوہوں میں بال دوبارہ اگنے لگے ہیں۔
محققین نے دعوی کیا ہے کہ یہ شوگر انسان اور جانور دونوں کے جسموں میں مختلف حیاتیاتی افعال میں اہم کردار ادا کرتی ہے۔
پچھلے آٹھ سالوں سے سائنس دان یہ سمجھنے کی کوشش کر رہے تھے کہ یہ شوگر کس طرح نئے خون کی شریانیں بنا کر زخموں کو بھرنے میں مدد کرتی ہے۔
ٹیم نے یہ مشاہدہ کیا کہ شوگر کو اگر زخموں پر لگایا جائے تب بھی اس سے بالوں کی نمو میں نمایاں تیزی آئی ہے جبکہ جہاں شوگر کا استعمال نہیں ہوا وہاں بالوں کی افزائش نہیں ہوسکی۔
