گلوکارہ نصیبو لال پر بھی شوہر کا تشدد، مقدمہ درج کرلیا گیا

اداکارہ نرگس کے بعد گلوکارہ نصیبو لال بھی شوہر کے تشدد کا نشانہ بن گئیں۔

لاہور: معروف گلوکارہ نصیبو لال پر ان کے شوہر نوید حسین نے مبینہ طور پر تشدد کیا، جس کے بعد شاہدرہ ٹاؤن پولیس نے ملزم کے خلاف مقدمہ درج کر لیا ہے۔

پولیس کو دی گئی درخواست کے مطابق گلوکارہ اپنے صحن میں بیٹھی تھیں کہ ان کے شوہر نے آتے ہی گالم گلوچ اور بدتمیزی شروع کر دی۔ ایف آئی آر کے مطابق ملزم نے قریب پڑی اینٹ اٹھا کر نصیبو لال کے چہرے پر دے ماری، جس سے ان کی ناک اور چہرے پر شدید چوٹ آئی۔ گلوکارہ نے موقف اختیار کیا ہے کہ ان کا شوہر اکثر ان سے جھگڑا کرتا ہے۔

پولیس کا کہنا ہے کہ ملزم کے خلاف مقدمہ درج کر لیا گیا ہے اور جلد گرفتار کر لیا جائے گا۔ یہ واقعہ اس وقت سامنے آیا ہے جب کچھ عرصہ قبل اداکارہ نرگس بھی گھریلو تشدد کا نشانہ بنی تھیں، جس پر شوبز انڈسٹری میں شدید ردعمل دیکھنے میں آیا تھا۔