کراچی، راولپنڈی سے گاڑی خریدنے آنیوالے نوجوان کو دوستوں نے پیسوں کی لالچ میں قتل کردیا۔
تھانہ ڈیفنس پولیس کی جانب سے مقتول محمد مصطفیٰ کے والد محمد کوثر کی مدعیت میں مقدمہ درج کرلیا گیا، مقدمے میں قتل سمیت دیگر دفعات شامل کی گئی ہیں۔
ایف آئی آر کے مطابق 14 فروری کو مقتول محمد مصطفی ٰاپنے 2 دوستوں مجاہد خان اور عبید خان کے ساتھ کراچی آیا تھا، مقتول محمد مصطفیٰ راولپنڈی سے کراچی گاڑی خریدنے کے لئے 70 لاکھ روپے کی رقم لے کر آیا تھا۔
مقتول کے والد کی جانب سے ایف آئی آر میں لکھوایا گیا کہ 18 فروری کو جب مصطفیٰ سے رابطہ نہیں ہوا تو اس کے دوستوں سے رابطہ کیا گیا، مجاہد خان نے پہلے ٹال مٹول سے کام لیا پھر کہا مصطفیٰ سو رہا ہے، معاملہ مشکوک جان کر اپنے عزیز علی کو گیسٹ ہاؤس پر بھیجا، جہاں پتہ چلا کہ میرے بیٹے کو کنپٹی پر گولی لگی ہے۔
ایف آئی آر کے مطابق ملزم عبید خان 70 لاکھ روپے، پستول اور گاڑی لے کر فرار ہوگیا تھا، فرار ملزم کے ساتھی مجاہد خان کو پولیس کے حوالے کردیا گیا ہے، مقتول کی لاش 18 فروری کو ڈیفنس کے ایک گیسٹ ہاؤس کے کمرے سے ملی تھی۔
پولیس نے کہا کہ واقعے کی تحقیقات کی جارہی ہیں، فرار ملزم کو جلد گرفتار کرلیا جائے گا۔
