پشاور، کرم امن معاہدے پر عملدرآمد یقینی بنانے کیلئے فریقین کی کمیٹیاں بنانے کا فیصلہ کیا گیا ہے۔
ضلع کرم میں امن وامان کے حوالے سے گزشتہ روز ہونیوالے امن جرگہ میں قبائلی عمائدین، چیف سیکرٹری، کمشنر کوہاٹ اور دیگر حکومتی اراکین شامل تھے۔
جرگہ میں کرم امن معاہدہ پر ہر حال میں عمل درآمد کی ہدایت کی گئی جبکہ معاہدے پر عمل درآمد کے لیے دونوں فریقین کی کمیٹیاں بنانے کا فیصلہ ہوا، جرگہ کی اگلی بیٹھک کا اعلان مشاورت کے بعد ہوگا۔
جرگہ عمائدین نے کہا کہ کرم کا مسئلہ نفرت کا نتیجہ ہے، ہم نے اسلامی تعلیمات بھلا دی ہیں۔
اس موقع پر چیف سیکرٹری خیبرپختونخوا چودھری ندیم اسلم کا کہنا ہے کہ حکومت اور عمائدین کرم دونوں کو کردار ادا کرنا چاہیے، امن ہر صورت قائم ہوگا، کرم کے لیے ریلیف پیکیج منظور کر رہے ہیں، شرپسند رکاوٹ ڈالیں گے تو قانون حرکت میں آئے گا۔
چیف سیکرٹری نے کہا کہ امن میں سب کا فائدہ ہے، دونوں فریقین امن کی بحالی میں حکومت کا ساتھ دیں، آپریشن کا آپشن موجود ہے، آپریشن سے سب متاثر ہوں گے۔
