ڈپٹی کمشنر گجرات صفدر حسین ورک کی زیر صدارت ضلع میں جاری ترقیاتی منصوبوں پر پیش رفت کا جائزہ اجلاس منعقد ہوا۔
گجرات: ڈپٹی کمشنر گجرات صفدر حسین ورک کی زیر صدارت ضلع میں جاری ترقیاتی منصوبوں پر پیش رفت کا جائزہ اجلاس منعقد ہوا، جس میں تمام متعلقہ محکموں کے افسران نے شرکت کی۔ اجلاس میں سالانہ ترقیاتی پروگرام 2024-25 اور دیگر منصوبوں پر عملدرآمد کا تفصیلی جائزہ لیا گیا۔
ڈپٹی کمشنر نے اجلاس سے خطاب کرتے ہوئے کہا کہ عوامی فلاح و بہبود کے منصوبے حکومت کی اولین ترجیح ہیں، اور ان کی بروقت تکمیل کے لیے تمام وسائل بروئے کار لائے جائیں۔
انہوں نے ہدایت کی کہ ترقیاتی اسکیموں میں شفافیت اور اعلیٰ معیار کو یقینی بنایا جائے اور کسی بھی منصوبے میں تاخیر برداشت نہیں کی جائے گی۔
اجلاس میں ڈپٹی کمشنر کو بریفنگ دی گئی کہ ضلع گجرات میں 42 ارب روپے کی لاگت سے 245 ترقیاتی منصوبے جاری ہیں، جن میں سڑکوں کی تعمیر و بحالی، تعلیمی اداروں کی اپ گریڈیشن، صحت کی سہولیات کی بہتری اور دیگر عوامی فلاحی منصوبے شامل ہیں۔
اس کے علاوہ، سالانہ ترقیاتی پروگرام کے تحت 71 منصوبے بھی زیر تکمیل ہیں، جن پر کام تیزی سے جاری ہے۔
ڈپٹی کمشنر نے متعلقہ محکموں کو ہدایت کی کہ ترقیاتی کاموں کی روزانہ کی بنیاد پر مانیٹرنگ کی جائے اور عوام کو زیادہ سے زیادہ سہولیات فراہم کرنے کے لیے منصوبوں کو جلد مکمل کیا جائے۔
انہوں نے واضح کیا کہ غیر معیاری کام یا کسی قسم کی غفلت برداشت نہیں کی جائے گی اور ترقیاتی اسکیموں میں شفافیت کو ہر صورت یقینی بنایا جائے۔
