آئی سی سی چیمپئنز ٹرافی کا آج آسٹریلیا اور جنوبی افریقا کے درمیان شیڈولڈ میچ بارش کے باعث منسوخ کردیا گیا۔
راولپنڈی میں شیڈول آئی سی سی چیمپیئنز ٹرافی کا ساتواں میچ بارش کے باعث منسوخ کر دیا گیا، جس کے نتیجے میں آسٹریلیا اور جنوبی افریقا کو ایک، ایک پوائنٹ دے دیا گیا۔
ایکسپریس نیوز کے مطابق، مسلسل بارش کے باعث نہ تو ٹاس ہو سکا اور نہ ہی میچ شروع ہونے کی امید باقی رہی۔ امپائروں نے موسم کا جائزہ لینے کے بعد دوپہر ڈیڑھ بجے ٹاس میں تاخیر کا اعلان کیا، تاہم شام 5 بجے کے قریب باضابطہ طور پر میچ کی منسوخی کا اعلان کر دیا گیا۔
گروپ بی کی صورتحال پر نظر ڈالیں تو جنوبی افریقا 3 پوائنٹس کے ساتھ سرفہرست ہے، جبکہ آسٹریلیا بھی اتنے ہی پوائنٹس کے ساتھ دوسرے نمبر پر موجود ہے۔ آسٹریلیا کو سیمی فائنل میں جگہ بنانے کے لیے اپنے اگلے میچ میں افغانستان کے خلاف لازمی فتح درکار ہوگی۔
اس کے علاوہ، آج قومی کرکٹ ٹیم کا پریکٹس سیشن بھی شیڈول تھا، مگر خراب موسم کے باعث اسے بھی منسوخ کرنا پڑا۔ ماہرین کا کہنا ہے کہ مسلسل بارش کے سبب چیمپیئنز ٹرافی کے شیڈول پر بھی اثر پڑ سکتا ہے۔
