سرگودھا، قومی اسمبلی میں اپوزیشن لیڈر اوررہنما تحریک انصاف عمر ایوب کا کہنا ہے کہ چیف جسٹس آف پاکستان سے ملاقات کا مقصد انہیں ملکی حالات سے آگاہ کرنا تھا۔
سرگودھا کی انسداد دہشتگردی عدالت کے باہر میڈیا سے گفتگو کے دوران اپوزیشن لیڈر عمر ایوب نے کہا کہ چیف جسٹس آف پاکستان سے ملاقات کے دوران انہیں تمام حالات سے آگاہ کر دیا ہے، امید ہے پاکستان میں انصاف کا بول بالا ہوگا، ہمارے اوپر جھوٹے مقدمات درج کرنے کا سلسلہ ابھی تک نہیں تھم سکا۔
عمر ایوب کا کہنا ہے کہ مؤثر عدالتی نظام کے لیے تحریک انصاف جلد اپنی تجاویز باضابطہ طور پر چیف جسٹس کو دیگی، تحریک انصاف کے پاس بہتر لیگل ٹیم موجود ہے، جب تک عدالتی نظام میں بہتری نہیں آتی لوگوں میں غم و غصہ بڑھے گا، 2 مرتبہ بغیر آلات اور مانیٹرنگ کے عمران خان سے ملاقات کی درخواست کی، دونوں مرتبہ حکومت نے حامی بھر کر ملاقات کرانے سے انکار کیا۔
عمر ایوب نے کہا کہ بلوچستان میں حالات بدستور کشیدہ چل رہے ہیں، فوج کے جوان دہشت گردوں کے ہاتھوں شہید ہو رہے ہیں، ملک میں کوئی حکومت نام کی چیز نہیں جو حالات کو بہتر بنائے، موجودہ حکومت کے پاس وہ ویژن ہی نہیں جس سے حالات بہتر کیے جا سکتے ہیں، ہم نے تو اسی ملک میں رہنا ہے ہمارے آباؤ اجداد یہیں رہتے رہے ہیں۔
دوسری جانب سینئر رہنما مسلم لیگ (ن) و سابق وفاقی وزیر خواجہ سعد رفیق کی جانب سے ایکس (سابقہ ٹوئٹر) پر سے پابندی ہٹانے کا مطالبہ کردیا گیا۔
