صدر ٹرمپ نے امریکی جوائنٹ چیفس آف اسٹاف کے چیئرمین کو عہدے سے فارغ کردیا۔
امریکی صدر ڈونلڈ ٹرمپ کی جانب سے سیاہ فام امریکی جوائنٹ چیفس آف اسٹاف کے چیئرمین جنرل چارلس براؤن کو فارغ کر دیا گیا۔
جنرل چارلس براؤن امریکی فضائیہ میں فائٹر پائلٹ کی حیثیت سے تاریخ ساز عہدیدار سمجھے جاتے ہیں اور فوج میں مختلف نسلوں اور صنفی برابری کے چیمپئن مانے جاتے تھے وہ امریکی فوج میں دوسرے سیاہ فام جنرل تھے جو جوائنٹ چیفس آف اسٹاف کے چیئرمین کے عہدے تک پہنچے تھے۔
غیر ملکی میڈیا کا بتانا ہے کہ امریکا جنرل چارلس براؤن کے 16 ماہ کے دور میں یوکرین اور مشرق وسطیٰ کی جنگوں میں پھنسا رہا۔
غیر ملکی میڈیا کا بتانا ہے کہ صدر ٹرمپ نے ائیر فورس کے لیفٹیننٹ جنرل ڈین رازین کین کو چارلس براؤن کی جگہ چیئرمین جوائنٹ چیفس آف اسٹاف مقرر کر دیا ہے۔
علاوہ ازیں ٹرمپ انتظامیہ نے محکمہ دفاع میں 5 ہزار چھانٹیاں کرنے کا بھی فیصلہ کیا ہے جبکہ امریکی صدر ڈونلڈ ٹرمپ کی جانب سے یوکرین سے 500 ارب ڈالر معاوضہ طلب کرتے ہوئے کہا گیا کہ ہم نے یوکرین جنگ پر اپنا خزانہ خرچ کیا۔
دوسری جانب برطانوی میڈیا کی جانب سے دعویٰ گیا ہے کہ یوکرین کے صدر زیلنسکی امریکی سرمایہ کاروں کو معدنیات تک رسائی دینے کے لیے آمادہ ہو گئے ہیں۔
