عدالت نے سابق وزیر اعلیٰ پنجاب چوہدری پرویز الٰہی کی حاضری معافی کی درخواست منظور کرلی ہے۔
لاہور، احتساب عدالت کی جانب سے ترقیاتی منصوبوں میں مبینہ کرپشن ریفرنس میں سابق وزیراعلیٰ پنجاب و صدر پی ٹی آئی پنجاب چودھری پرویز الہٰی کی حاضری معافی کی درخواست منظور کر لی گئی ہے۔
لاہور کی احتساب عدالت کے جج زبیر شہزاد کیانی نے چودھری پرویز الہٰی سمیت دیگر کے خلاف ترقیاتی منصوبوں میں مبینہ کرپشن ریفرنس پر سماعت کی۔
سماعت کے دوران وکیل مختار رانجھا نے پرویز الہٰی کی 1 روزہ حاضری معافی کی استدعا کی، درخواست میں کہا گیا کہ پرویز الہٰی کی طبیعت ناساز ہے، عدالت 1 روزہ حاضری سے استثنیٰ دینے کا حکم دے۔
لاہور کی احتساب عدالت کی جانب سے چودھری پرویز الہٰی کی حاضری معافی کی درخواست منظور کرتے ہوئے کارروائی 28 اگست تک ملتوی کر دی گئی ہے۔
دوسری جانب وزیر اطلاعات پنجاب عظمیٰ بخاری کا کہنا ہے کہ 9 مئی کرنے والوں اور کرانے والوں کا گینگ آہستہ آہستہ ایکسپوز ہو رہا ہے۔
صوبائی وزیر اطلاعات و نشریات عظمیٰ بخاری نے اپنے بیان میں یہ کہا کہ فوجی تنصیبات پر حملے کرنے اور کروانے والے ایک ہی گینگ کے پارٹنر ہیں، اب اس میں کوئی چیز چھپی ہوئی نہیں رہی، 9 مئی کا ماسٹر مائنڈ کون ہے اور اسکے سہولت کار کون تھے، سابق وزیراعظم عمران خان کے اب نقاب اترنا شروع ہوگئے ہیں۔
