چوہدری شجاعت حسین کی سیاست پر عمل پیرا، انتقام ہماری سیاست کا حصہ نہیں: چوہدری شافع حسین

گجرات: صوبائی وزیر صنعت و تجارت چوہدری شافع حسین نے کہا ہے کہ وہ چوہدری شجاعت حسین کی رواداری اور عزت کی سیاست پر عمل پیرا ہیں اور کبھی انتقامی کارروائیوں پر یقین نہیں رکھتے۔ انہوں نے انکشاف کیا کہ سابقہ دورِ حکومت میں بے پناہ کرپشن ہوئی، تبادلوں کے لیے پیسے لیے گئے اور یونیورسٹیوں کے چارٹر 15، 15 کروڑ روپے میں فروخت کیے گئے، جس کا احتساب ضروری ہے۔

چوہدری شافع حسین نے کہا کہ جب انہوں نے وزارت صنعت و تجارت کا قلمدان سنبھالا تو صنعتی مراکز میں پراپرٹی مافیا سرگرم تھا۔ تاہم، انہوں نے فوری ایکشن لیتے ہوئے انڈسٹریل اسٹیٹس کو مافیا سے پاک کیا۔ انہوں نے مزید کہا کہ آنے والے دنوں میں مزید بہتری لائی جائے گی تاکہ کرپشن کا خاتمہ اور صنعتوں کی ترقی ممکن بنائی جاسکے۔